मदाने, ०६ कार्तिक ।
मदाने गाउँपालिका अग्लुङ्गमा रहेको अग्लुङ्ग माध्यमिक विद्यालयले सहायक प्रधानाध्यापक गुमानसिंह बिष्टलाई बिदाई गरेको छ । ६० बर्ष पुगेपछि शिक्षक गुमानसिंह बिष्टले अवकाश प्राप्त गर्दै गर्दा उहाँलाई विद्यालयले एक विदाई कार्यक्रम गर्दै विदाई गरेको छ ।
वि.स २०३९ सालदेखि प्रा वि तहबाट अध्यापन गराउन सुरु गर्नु भएका शिक्षक बिष्ट एकदमै शालिन स्वभावका हुनुहुन्छ । सोहि समय देखि नै उहाँले विद्यालयको निमित्त प्रमुख र विद्यालय व्यवस्थापन समितिका शिक्षक प्रतिनिधि रहेर सेवा गर्दै आउनु भएको थियोे । त्यतिबेला विद्यालयको अवस्था नाजुक थियोे, भौतिक तथा सामाजिक र आर्थिक क्षेत्रमा अपुर्ण विद्यालयमा अध्यापन गराउदै थुप्रै समस्याहरु भोगेको उहाँको अनुभव छ । निरन्तर एउटै विद्यालयमा ३९ बर्ष अध्यापन गराउदै गर्दा भोगिरहेका समस्यालाई चिर्दै विद्यार्थीको उज्ज्वल भविष्यका लागि निरन्तरता दिनुभयो । विद्यालयको सबैभन्दा पुरानो शिक्षकलाई बिदाई गर्दै गर्दा बिदाई कार्यक्रममा बोल्ने वक्ता तथा विद्यार्थीहरु दुख व्यक्त गरेका छन । साथै सहायक प्रधानाध्यापक सँगै शिक्षिका राधिका भुषाल लाई पनि बिदाइ गरिएको छ । छोटोसमय अध्यापन गराउनुभएकी शिक्षिका राधिका भुषाल बाझकटेरी प्रा विमा सरुवा हुनुभएको छ ।
मदाने गाउँपालिका वडा न १ का वडा अध्यक्ष प्रेम चन्द बोहरा प्रमुख अतिथि रहेको विदाई कार्यक्रमका विशिष्ट अतिथिमा पुर्व विद्यालय व्यवस्थापन समितिका अध्यक्ष तथा समाजसेवी व्यक्ति नारायण चन्द रहनु भएको थियोे । कार्यक्रममा विद्यालयका प्रधानाध्यापक भविलाल खत्री, विद्यालय व्यवस्थापन समितिका अध्यक्ष लोक बहादुर घर्ती, वडा सदस्य हरि बहादुर बिक, शिक्षक प्रतिनिधि, वि.व्य.स का सदस्यहरु, स्थानिय समाजसेवी तथा बुद्धिजीवीहरुको उपस्थित रहेको थियोे ।
कार्यक्रममा बोल्दै प्रमुख अतिथि वडाअध्यक्ष प्रेम चन्द बोहोराले बिदाई हुनुभएका सबैभन्दा अग्रज शिक्षक गुमानसिंह बिष्टले गर्नुभएको योगदानको प्रशंसा गर्नुभयो साथै अग्लुङ्गमा रहेका विभिन्न विद्यालयहरुको शैक्षिक गुणस्तर बढाउन आवश्यक काम भैरहेको बताउनुभयो। विद्यालय समितिका अध्यक्ष लोकबहादुर घर्ती कार्यक्रममा बोल्दै ‘आफुलाई पढाएको अग्रज गुरु निरन्तर रुपमा विद्यालयको शैक्षिक गुणस्तरीय निर्माण गरी ठूलो योगदान पुर्याएको’ बताउनुभयो ।
पुर्व विद्यालय व्यवस्थापन समितिका अध्यक्ष नारायण चन्दले भन्नुभयो ” अग्लुङ्गमा शैक्षिक क्षेत्र नाजुक थियो, मलाई शिक्षक गुमानसिंह विष्टले धेरै कुरा पढाएर,सिकाएर अहिले म यो स्थानमा छु, उहाले गर्दा नै राम्रोसँग अग्रेजी पढ्न र बुझ्न सक्छु, यति मात्र नभएर उहाँले विद्यालयमा अनवरत रुपमा शैक्षिक सेवा गरि विद्यार्थीहरुको ज्ञानलाई फराकिलो बनाउनु भएको छ ।” विद्यालयका प्रधानाध्यापक भविलाल खत्रीलाई पनि अध्यापन गराउनु भएका शिक्षक बिष्टलाई अन्य बोल्ने वक्ताहरुले आगामी भविष्य शुभकामना व्यक्त गरेका थिए ।
आफू प्रधानाध्यापक रहेर काम गरिरहदा उहाँको अग्रजपन सदैव रहिरहयो, विद्यालयको शैक्षिक गुणस्तर वृद्धिमा उहाँलाई श्रेय दिदै आफुलाई थुप्रै सहयोग गरेको प्रधानाध्यापक भविलाल खत्रिले बताउनुभएको छ । उक्त बिदाइ कार्यक्रमको स्वागत मन्तव्य शिक्षिका टीका उपाध्याय र संचालन शिक्षक कृष्ण चन्दले गर्नु भएको थियोे ।
