गुल्मी, साउन २९ । जिल्लाको मदाने गाउँपालिका वडा न १ मा स्वास्थ्य इकाई संचालन भएको छ ।
भौगोलिक हिसाबले दुर्गम मानिने वडा न १ अग्लुङ्गको झातावाङ्गमा निपाने घडेरी स्वास्थ्य ईकाइ संचालनमा आएको हो ।
बुधबार औपचारिक रुपमा उदघाटन कार्यक्रममा वडा अध्यक्ष प्रेम चन्द बोहरा, अग्लुङ्ग स्वास्थ्य चौकीका इन्चार्ज लोकेन्द्र नारायण थारु लगायतका व्यक्तिहरुद्वारा उदघाटन गरि सञ्चालनमा आएको छ । दुर्गम स्थानका जनताहरुलाई स्वास्थ सेवामा टेवा पुर्याउने उदेश्यले आ.ब २०७४/७५ र ०७५/७६ मागाउँपालिका बाट रकमान्तर गरि ३ कोठे भवन सम्पन्न भएको हो ।
अग्लुङ्ग सामुदायिक स्वास्थ्य इकाईको सेवा सुचारुका लागि गत माघमा एक जना अहेब र कार्यालय सहयोगी कर्मचारी नियुक्त भएता पनि कार्य हुन सकेको थिएन ।
नेपाल सरकार,स्वास्थ मन्त्रालयले स्वास्थ चौकीलाई सूचीकरण गरेका औषधिहरु वितरण गरिने यस स्वास्थ्य इकाईबाट हप्तामा ६ दिन नियमित स्वास्थ्य सेवा प्रदान गरिने अग्लुङ्ग स्वास्थ्य चौकिका ईन्चार्ज लोकेन्द्र नारायण थारुले बताउनु भएको छ ।
सो सामुदायिक स्वास्थ्य इकाई सुचारु सँगै स्थानिय अग्लुङ्ग घडेरी र निपाने दुई दुर्गम गाउँका करिब १२० घरधुरिका ६०० स्थानीय भन्दा बढी उपभोक्ताहरु प्राथमिक उपचार बाट प्रत्यक्ष लाभान्वित हुने वडा न १ वडा अध्यक्ष प्रेम चन्दले बताउनुभयो । साथै उहाँले भन्नुभयो ” आगामी दिनहरुमा यस स्वास्थ्य इकाईलाई बर्थिङ्ग सेन्टरमा बिस्तार गरिने छ । स्थानिय सेवा सुविधाको मागलाई सम्बोधन गर्दै दुर्गम टोल निपानेमा यस्तो स्वास्थ्य इकाई संचालन गरिएको हो ।”
