बुटवल ,
रुपन्देहीमा एक आपसमा दुई वटा मोटरसाइकल ठक्कर खाँदा एक जनाको मृत्यु भएको छ भने अन्य ३ जना घाइते भएका छन् । आइतबार साँझ रुपन्देहीको तिलोत्तमा नगरपालिका वडा नं. १४ टिकुलीगढ स्थित भित्री सडकमा लु ५९ प ४७२३ र लु ३ प ७६२६ नम्बरको मोटरसाइकल एक आपसमा ठक्कर खाँदा तित्तोतमा १४ बगुधाराका २५ वर्षीय बलिराम चौधरीको मृत्यु भएको प्रदेश प्रहरी कार्यालय दाङका प्रहरी प्रवक्ता राजकुमार बैदाबारले बताए ।
उनको उपचारको क्रममा मणिग्राम रहेको क्रिमशन अस्पतालमा मृत्यु भएको हो । दर्घटनामा परी तिलोत्तमा १४ का २१ वर्षका बल बहादुर चौधरी, तिलोत्तमा ७ का २६ वर्षमा गोबिन्ध चौधरी र २२ वर्षका सुदिप चौधरी घाइते भएको प्रहरीले जनाएको छ । घाइते तीनै जनाको क्रिमशन अस्पतालमा उपचार भईरहेको छ । प्रहरीले दुवै मोटरसाइकल नियन्त्रणमा लिएर थप घटनाका बारेमा अनुसन्धान गरेको छ ।
