थम्मन थापा बागलुङ जेठ ३१
गलकोट नगरपालिका वडा नम्बर ७ मल्ममा कोभिड १९ तथा विपत व्यवस्थापन कोष स्थापना गरिएको छ । अहिले विश्व व्यापी माहामारीको रूपमा फैलिरहेको कोरोना भाइरस कोभिड १९ र विभिन्न समयमा वडामा आइपर्ने प्राकृतिक सँगै अन्य विपत्ति लाई मध्यनजर गर्दै राहत कोष संकलन अभियान शुभारम्भ गरिएको गलकोट नगरपालिका ७ का वडा अध्यक्ष सुवेदार टिका बहादुर थापाले जानकारी दिनुभयो । राहत कोषमा अहिले झण्डै २ लाख रुपैयाँ संकलन भइसकेको छ । वडामा आयोजित सर्वदलीय सर्वपक्षीय बैठकले कोभिड १९ तथा विपत व्यवस्थापन कोष नामाकरण गरी कोषलाई दीर्घकालीन रुपमा अगाडि बढाउने निर्णय गरेको नेपाल कम्युनिष्ट पार्टी नेकपाका वडा कमिटी अध्यक्ष ललित मरासिनीले बताउनु भयो ।
कोषलाई व्यवस्थित र पारदर्शी रूपमा अगाडि बढाउन वडा अध्यक्ष टिका बहादुर थापा संयोजक रहेको २९ सदस्यीय कोभिड १९ तथा विपत व्यवस्थापन समिति गठन गरेको नेपाली कांग्रेसका वडा सभापति चिरञ्जीवी मरासिनीले जानकारी दिनुभयो । वडा भित्र कोरोना भाइरसको संक्रमण भएमा या अन्य विपत आइपरेमा कोष मार्फत अत्यावश्यक अवस्थामा खर्च गर्न ९ सदस्यीय सचिवालय समिति समेत चयन गरिएको छ । गाउँ टोल देखि देशभर आर्थिक संकलन अभियानलाई अगाडि बढाउन वडा सदस्य लक्ष्मी सार्की संयोजक रहेको २७ सदस्यीय आर्थिक संकलन समिति पनि चयन भएको छ । त्यस्तै विदेशमा रहेका वडाका नागरिकहरुलाई पनि अभियानमा सहभागीता गराउन विदेश विभाग गठन गर्ने निर्णय गरिएको छ त्यसको लागि सामाजिक संस्था घुम्टे युवा परिवार जापान शाखालाई जिम्मा प्रदान गरिएको वडा सदस्य लोक बहादुर थापाले जानकारी दिनुभयो ।
कोभिड १९ तथा विपत कोष सम्बन्धि कार्य विधि निर्माण गर्न प्रध्यापक डाक्टर दिन बहादुर थापा, डाक्टर गंगाराम गौतम र बुद्धिजीवी होम बहादुर थापालाई जिम्मा दिइएको वडा सदस्य मिना दर्जीले बताउनु भयो । अहिले उक्त कोभिड १९ तथा विपत व्यवस्थापन कोषमा सहयोग गर्ने सहयोगी मनहरुको संख्या दिनहुँ बढ्दै गइरहेको छ । अभियानलाई गाउँ देखी सहर अनि देश विदेश सम्म जोड्नको लागि सामाजिक सञ्जाल मार्फत कार्य सम्पादन पनि हुँदै आएको छ । अभियानको देश विदेशमा रहेका वार्डबासी नागरिकहरुले प्रशंसा समेत गरेका छन् । कोष स्थापना भए पछि वडामा आई पर्ने प्राकृतिक विपत तथा कोभिड १९ को लागि खर्च व्यवस्थापन गर्न सहज हुने बताइएको छ ।
