नयाँ नक्साको स्वागतमा फर्साटिकरमा दिप प्रज्ज्वल-(फोटा सहित )

अर्जुन खत्री-फर्साटिकर रुपन्देही – जेठ ३१ – कालापानी लिपुलेख र लिम्पियाधुरा समाबेश भएको नेपालको नयाँ नक्सा संविधान संशोधनमार्फत संघिय संसदबाट पारित भएसङ्गै रुपन्देहीको शुद्धोधन ४ फर्साटिकरमा नयाँ नक्साको स्वागत र खुशीयालिमा दीपप्रज्जवल गरिएको छ। फर्साटिकर चोकमा राष्ट्रिय झन्डासहित एकता समृद्धि राष्ट्रिय अखण्डता लेखी नेपालको नक्सा बनाएर दिपावली गरिएको हो। शुद्धोधन गाउँपालिकाको आयोजनमा भएको दीपप्रज्जवलनमा प्रदेश न.५ प्रदेशसभा सदस्यद्वय तुलसी चौधरी,पुस्पा चौधरी, शुद्धोधन गाउँपालिका अध्यक्ष किसुनचन्द चौधरी, नेकपा शुद्धोधन अध्यक्ष नरबहादुर घर्ती, नेपाली कांग्रेस रुपन्देही क्षेत्र नं ३ ख का क्षेत्रिय सचिव केशब अधिकारले बोल्दै भारतले अतिक्रमण गरेको भुमी लिपुलेख,लिम्पियाधुरा र कालापानी नेपालले नयाँ नक्सामा समाबेश गरि संघीय संसदबाट सर्वसम्मतले पारित गरेको आजको दिन नेपालको ऐतिहासिक दिन भएकाले नया नक्सा जारी गरि पारित गराएमा सरकारलाई धन्यवाद दिदै अब भुमी प्राप्तिका लागि सरकारले पहलकदमी चाल्नुपर्नेमा जोड दिनुभएको थियो।

दीपप्रज्जवलमा शुद्धोधन गाउँपालिका अध्यक्ष किसुनचन्द चौधरीको अध्यक्षता, प्रदेश सांसद तुलसी चौधरीको प्रमुख आतिथ्यता ,प्रदेश सांसद पुष्पा चौधरीको विशिष्ट आतिथ्यता रहेको कार्यक्रमको सञ्चालन शुद्धोधन गाउँपालिका प्रवक्ता एंव वडा न.४ वडाअध्यक्ष राजेन्द्र कडेलले गर्नुभएको थियो भने दीपप्रज्जवलनमा अन्य जनप्रतिनिधि,विभिन्न पार्टीका प्रतिनिधि,फर्साटिकर व्यापार संघका प्रतिनिधि,इन्सेक शुद्धोधनका प्रतिनिधि,स्थानीय युवाहरु लगायत सहभागी भइ खुशियाली मनाएका थिए ।