मदाने गुल्मी, २९ बैशाख।
अग्लुङ्ग-बुटवल सम्पर्क अभियान द्वारा कोरोना नियन्त्रण तथा रोकथाम बिषयक अन्तरक्रिया कार्यक्रम गरेको छ । सामाजिक दुरी कायम गर्दै मदाने गाउपालिका वडा न. १ अग्लुङ्गमा सो कार्यक्रम सम्पन्न गरिएको हो ।
मदाने गाउपालिका वडा न १ का वडा अध्यक्ष प्रेम चन्द बोहरा, वडा सदस्यहरु, राजनितिक दलका प्रतिनिधिहरु, यस अभियानका मुल कार्यसमिति लगायत गाउका विभिन्न क्लब,समूह, संघसंस्थाका प्रतिनिधि व्यक्तिहरुको उपस्थितमा यो अन्तरक्रिया कार्यक्रम गरिएको अभियानका महासचिव सुमन खत्रीले जानकारी दिनुभयो ।
अन्तरक्रिया कार्यक्रम हिजो र आज दुई दिनसम्म चलेको थियोे । कार्यक्रममा मुख्य लकडाउन कार्यान्वयन,राहात विषय, जनप्रतिनिधि सँगको कोडिनेसन, हिसाबकिताब पार्दशिकता, मदिरा रोकथामलाई एजेन्डा बनाई वडा कार्यलयको सभाहलमा छलफल गरिएको थियोे। अभियानका सचिव विवश विष्टद्वारा कार्यक्रमको सुरुवात गर्दै अध्यक्ष विक्रमवावु विश्वकर्माले संस्थाको परिचय, उदेश्य र भावि योजना बारे प्रकाश पार्नुभएको थियोे । मदाने गाउपालिका वडा न.१ का वडा अध्यक्ष प्रेम चन्दले वडा कार्यालयबाट लकडाउन पश्चात कोरोना नियन्त्रण तथा रोकथामका लागि अहिले सम्म भएगरेका कार्यहरुमाथि प्रकाश पार्नुभएको छ।
कोरोना नियन्त्रण र रोकथामका लागि वडापालिकाबाट गर्न सकेको काम गरिरहेकोमा केही कमीकमजोरी पनि भेटिएका छन । ” वडाध्यक्षका अनुसार सुरुवाती चरणमा टोलटोलका प्रतिनिधि राखेर वडा कार्यालयमा बैठक राखि प्रत्येक टोलबाट ३/३ जनाको सदस्यमा लकडाउन कार्यान्वयन गर्नका साथै सुचना प्रवाहका लागि समिति बनाएको थियोे । समितिमा कुनैले उत्कृष्ट काम गरेको र कुनैले आफै उलङ्घन गर्दै हिडेकाले त्यति प्रभावकारी बन्न सकेन यद्यपि केही समयको लागि लकडाउन पुर्ण कार्यान्वयन आएको थियोे ।
त्यसपश्चात जिल्ला प्रशासन कार्यालय गुल्मीले विकाशका कार्य नरोकी पुन सञ्चालनमा अनुमति दिइएकाले अग्लुङ्गमा पनि विकास निर्माणका कार्य सञ्चालन गर्दै गर्दा योजना अनुसारको लकडाउन कडाई गर्ने कार्य केही हदसम्म खुकुलो भएको थियो तथापि अग्लुङ्ग खुकुलो छैन नियमअनुसार कडा कारवाही भएका छन । मदिरा सेवन गर्नेलाई आर्थिक तथा भौतिक कारबाही गरिएको छ” वडा अध्यक्षले बताउनुभयो । कालोबजारी नियन्त्रण तथा अनुगमनका लागि बनाएको समितिले राम्रो काम गर्न नसकेको स्वीकार्दै तत्काल पुरानो समिति खारेज नयाँ समिति बनाउने बताउनु भएको छ ।
यसरी लकडाउनको विकराल अवस्थामा पनि यो संस्थाले केकस्ता कार्य गरेर स्थानिय सरकारलाई सहयोग गर्न सक्छ, अबको बाटो के छ भनी वडा कार्यलयमा अन्तरक्रिया गरिएको अभियानले जनाएको छ। यसपश्चात लकडाउन कार्यान्वयन तथा कालोबजारी नियन्त्रण तथा अनुगमनका लागि कार्य गरिने अभियानका अध्यक्ष विक्रमबाबु विश्वकर्माले बताउनुभयो ।
