काठमाडौं । सीमा मिचिएको लिपुलेक क्षेत्रमा सशस्त्र प्रहरी बल नेपालको टोली जाने भएको छ । त्यसका लागि आवश्यक तयारी भइरहेको सशस्त्र प्रहरी बलले जनाएको छ । भारतसँग सीमा जोडिएका क्षेत्रमा खटिएका सशस्त्र प्रहरी बलको सक्रियताले कोरोना संक्रमित नेपाल प्रवेश गर्न सकिरहेको छैन । सीमा क्षेत्रमा अहिले १२ सय १३ पोष्ट राखिएका छन् ।
नेपालको भूमि हुँदै लिपुलेक क्षेत्रमा भारतले बाटो बनाएर उद्घाटन गरेपछि सशस्त्र प्रहरी बल त्यस क्षेत्रमा परिचालन गर्न लागिएको सशस्त्र प्रहरी बल उच्च स्रोतले जनाएको छ ।
सशस्त्र प्रहरी बल अहिले तराई क्षेत्रको सीमा क्षेत्रमा मात्र तैनाथ छ । अब लिपुलेक क्षेत्रमा पनि सशस्त्र प्रहरीको बीओपी तत्काल खडा गर्ने तयारी छ ।
सो क्षेत्रमा तत्काल बस्नका लागि घर नपाउने समस्या रहेको भन्दै घर खोज्दै तत्काल पालमा बसेर भए पनि सीमा रक्षाका लागि सशस्त्र खटाउने तयारीमा जुटेको छ ।
लिपुलेक क्षेत्रमा थिचोमिचो भइरहेको जानकारी यसअघि पनि आइरहँदा सरकारले बेवास्ता गर्दा सडक नै बनाएको छ । सशस्त्र प्रहरीलाई परिचालन गरी तत्काल सीमा क्षेत्रमा हुने गतिविधि नियन्त्रणका लागि काम गर्ने सशस्त्रको तयारी छ ।
अहिले सशस्त्र प्रहरी बल छ्याम्ब्रुमा रहने छ । सीमा क्षेत्रबाट सो एरिया १० किलोमिटर वर पर्छ । छ्याम्ब्रुभन्दा उता बस्ती पनि छैन । तत्काल बस्ने ठाउँको अभावका कारण छ्याम्ब्रुमा सशस्त्रको बीओपी खडा गरिनेछ । ‘अहिले घर भाडामा लिएर भए पनि राख्ने भन्ने योजना बनेको छ’ सशस्त्र प्रहरी बल उच्च स्रोत भन्यो ।
तत्कालका लागि प्लाटुन लेबलको सशस्त्र प्रहरी परिचालित हुनेछ । बस्ने ठाउँको राम्रो बन्दोबस्त गर्न सकियो भने सशस्त्र प्रहरीले गण नै खडा गर्ने तयारी समेत छ ।
