मदाने गुल्मी,१२ बैशाख।
मदाने गाउँपालिकामा लकडाउन खुकुलो बन्दै गएको छ। नेपाल सरकारले घोषणा गरेको लकडाउनलाई पुर्ण समर्थन गर्दै लकडाउनको नियम पालना गराउनु पर्नेमा मदाने गाउँपालिका पछि सरेको पाइएको स्रोत बताउछ ।
मदाने गाउँपालिका वडा न १ लगायतका विभिन्न वडाहरुमा यस्तो अवस्था सिर्जना भएको छ । सुरुवाती चरणमा लकडाउनको पुर्ण समर्थन गर्दै आएर स्थानिय सरकारद्वारा स्थानिय नियमहरु समेत बनाउदै कार्यान्वयनमा ल्याएको वडा न.१ अग्लुङ्गमा पछिल्लो समय नियमको पालना र कार्यान्वयन शुन्य छ ।
विश्वव्यापी फैलिरहेको कोरोना भाइरस कोभिड १९ नियन्त्रणका लागि नेपाल सरकारले घोषणा गरेको लगडाउन लम्बिदै १ महिना पुगेको छ । यसरी लम्बिदै गर्दा स्थानिय सरकारले यसप्रति चासो नदेखाई खुकुलो बनाउदै आएको स्थानिय जनताको गुनासो छ ।नेपालमा पनि कोरोना संक्रमण संख्या बढ्दै गईरहेको अवस्थामा यसरि स्थानिय तहहरुले चासो नदेखाउनु स्थानीय सरकारको कमीकमजोरी तथा नकारात्मक पक्ष भएको उनीहरु बताउछन ।
विकास निर्माणका कार्यले गर्दा यस्तो अवस्था सिर्जना भएको सरोकारवाला बताउछन। अग्लुङ्गको ओख्लेदहमा आजभोली दिनानुदिन ट्राक्टर प्युठानबाट आइ नै रहन्छ। साथै अन्य मालसामान बोक्ने गाडी पनि संचालनमा आईरहेको पाइन्छ।ओख्लेदह प्रा वि को भवन निर्माणका लागि कार्य सुचारु गरिएको निर्माण समिति का अध्यक्ष भगत चन्द बोहराले बताए । गौमखी गाउँपालिका सँग मदाने गाउँपालिका वडा न १ को समन्वयमा काम सुचारू गरिएको उनले बताए।
मदाने गाउँपालिका वडा न. १ अग्लुङ्गमा लकडाउनको बेला पिकनिक गएको समाचार पनि बाहिरिएको थियो। एक टोलबाट अर्को टोल प्रवेश गर्न निषेध नियम बनाएकोमा यतिबेला टोलटोलमा मात्र नभएर टाढाटाढाबाट आफन्त, इष्टमित्र, माइत ससुराल भनी आउने र जाने क्रम पनि रोकिएको छैन । यति मात्र नभएर टोलटोलमा स्थानिय गाडि संचालन गरिदै आएको छ । यहि समयमा विकास निर्माणका लागि भनेर गाडी संचालनमा आएका पाइएका छन । बुटवल तथा काठमाडौमा अलपत्र स्थानिय नागरिक घरमा आएका उनिहरुलाई होम क्वारेन्टाइनमा राखिएको वडा अध्यक्ष प्रेम चन्द बोहोराले जानकारी दिए।
यसका साथै स्थानिय स्तरमा यतिबेला कालोबजारी पनि मौलाइरहेको छ तर अनुगमन टोली कता छ कुनै अत्तोपत्तो छैन। एउटा रु १०० को रिचार्जलाई ११०/११५ भन्दा बढी लिदै आएका छन।यसका साथै चामल,चिनि लगायतका खाध्य सामाग्रीमा पनि पहिलेको भन्दा बढीमा बिक्रीवितरण गरिदै आएको स्थानियको गुनासो कसैले नसुनिदिएको अवस्था छ। यसरी लकडाउनमा कडाइ गर्दै कोरोना नियन्त्रणमा स्थानिय निकायको महत्त्वपूर्ण भुमिका हुनुपर्दछ। यो समयमा मौलाइरहेको कारोबजारीलाई नियन्त्रण गर्दै स्थानियको मागलाई सम्बोधन गर्नु आवश्यक देखिन्छ ।