विवश विष्ट
मदाने,गुल्मी २३ चैत।
मदाने गाउँपालिकाले अतिविपन्न घरपरिवारलाई राहत वितरण गर्ने भएको छ । आइतबार बसेको गाउँपालिकाको बैठकले प्रत्येक वडामा अतिविपन्न तथा गरिब १०० घरपरिवारका दरले जम्मा ७०० घरपरिवारलाई राहात दिने निर्णय गरेको हो।
राहात वितरणका लागि सबै तयारी पूरा गरेको साथै भोलीबाटै राहात वितरणका लागि प्रत्येक वडाका वडा अध्यक्षहरुलाई जिम्मा दिइसकेको गाउँपालिका उपाध्यक्ष सरिता खड्काले जानकारी दिनुभयो । कोरोना भाइरस कोभिड १९ को नियन्त्रणको लागि देशभर लकडाउन घोषणा भइरहेको अवस्थामा गरिब तथा अतिविपन्न एवं दिनभर काम गरि जिविकोपार्जन गर्दै आएका परिवारलाइ लक्ष्यित गरि राष्ट्रिय मापदण्डअनुसार राहात वितरण गर्न लागिएको उहाँले बताउनुभयो।
आज बसेको बैठकले गाउँपालिका अध्यक्ष दानबहादुर केसिको संयोजन तथा उपाध्यक्ष सरिता खड्काको सह-संयोजनमा नयाँ समिति बनाइएको छ । देशभर कोभिड १९ को जोखिम बढेकोले यश गाउपालिकामा नियन्त्रणका लागि सो समिति गठन गरिएको गाउँपालिका अध्यक्ष दान बहादुर केसिले जानकारी दिनुभएको छ । सो समितिमा प्रत्येक वडाका वडाध्यक्ष, राजनिती पार्टीका प्रतिनिधि, स्वास्थ्यकर्मी तथा गाउँपालिका प्रमुख प्रशासकिय अधिकृत लगायतलाई समेटिएको उहाँले बताउनुभयो ।
गाउँपालिकामा निर्माण गरिएको २१ बेडको क्वारेन्टाइनलाई थप गरिने भएको छ। कोरोना भाइरसको बढ्दो प्रकोप तथा जोखिमलाई ध्यानमा राख्दै जसको नियन्त्रणको लागि क्वारेन्टाइन बेड थप गरिने भएको हो। यसअघि निर्माण गरिएको वडा न ६ पुर्कोटदहमा ११ बेड र वडा न. १ अग्लुङ्गमा १० बेड बाहेक प्रत्येक वडामा १०/१० बेडका दरले क्वारेन्टाइन स्थापना गरिने गाउँपालिकाले जनाएको छ।
