काठमाडौं, असार १४ – नेकपा नेता झलनाथ खनालले मुलुकको राजनीतिक अवस्था र समयको आवश्यकतालाई मध्यनजर गर्दै वामपन्थी शक्तिहरूबीच एकता अपरिहार्य रहेको बताएका छन्।
जननेता मदन भण्डारीको ७५औँ जन्मजयन्तीको अवसरमा आयोजित कार्यक्रममा सम्बोधन गर्दै उनले लामो समयपछि दुई प्रमुख वामपन्थी दलका शीर्ष नेताहरू एउटै मञ्चमा उभिनु सकारात्मक संकेत भएको उल्लेख गरे।
खनालले वर्तमान परिस्थितिले वामपन्थी शक्तिहरूलाई एकताबद्ध हुन थप दबाब सिर्जना गरिरहेको भन्दै अब एकताको अभियानलाई व्यवहारमै उतार्ने समय आएको बताए। उनले आजकै दिनबाट वामपन्थी एकताको प्रक्रिया दीर्घकालीन सोचका साथ अघि बढाउनुपर्नेमा जोड दिए।
उनले देश र जनताको हितका लागि कम्युनिस्ट आन्दोलनलाई थप सुदृढ बनाउन सबै वामपन्थी शक्तिहरू एकजुट हुनुपर्ने धारणा पनि व्यक्त गरे।
