चितवन, असार ८ – राष्ट्रिय स्वतन्त्र पार्टी (रास्वपा) को प्रथम महाधिवेशन अन्तर्गत सोमबार बिहान सञ्चालन हुने भनिएको बन्दसत्र निर्धारित समयभन्दा निकै पछाडि धकेलिएको छ। कार्यतालिका अनुसार बिहान सुरु हुनुपर्ने सत्र तीन घण्टा भन्दा बढी समय बित्दा समेत प्रारम्भ हुन सकेको छैन।
महाधिवेशनमा विधान संशोधन प्रस्तावमाथि छलफल, विभिन्न सांगठनिक तथा आर्थिक प्रतिवेदन प्रस्तुत र अनुमोदन गर्ने तथा निर्वाचन समितिलाई आवश्यक जिम्मेवारी हस्तान्तरण गर्ने कार्यक्रम तय गरिएको थियो। तर प्रतिनिधिहरूको व्यवस्थापन र आवश्यक प्रक्रिया पूरा गर्न समय लागेपछि कार्यक्रम प्रभावित बनेको हो।
आयोजकका अनुसार महाधिवेशनका लागि करिब चार हजार प्रतिनिधिको प्रारम्भिक सूची सार्वजनिक गरिए पनि धेरै प्रतिनिधिको रुजु तथा विवरण प्रमाणीकरणको काम अझै जारी छ। यही कारण बन्दसत्र समयमै सञ्चालन गर्न कठिनाइ भएको बताइएको छ।
पार्टीका महामन्त्री कवीन्द्र बुर्लाकोटीले भने महाधिवेशनको सम्पूर्ण काम पूर्वनिर्धारित समयसीमा भित्रै सम्पन्न गर्ने तयारी भइरहेको बताए। उनका अनुसार बन्दसत्र सुरु भएपछि प्रतिवेदनहरूमाथि छलफल गरिने र त्यसलगत्तै निर्वाचन प्रक्रियालाई तीव्र गतिमा अघि बढाइनेछ।
निर्वाचनसँग सम्बन्धित प्राविधिक तयारी बिहानैदेखि चलिरहेको र उम्मेदवारी दर्तालगायतका प्रक्रिया छिटो सम्पन्न गर्ने गरी निर्वाचन आयोगले काम गरिरहेको पार्टी स्रोतले जनाएको छ।
महाधिवेशन स्थलमा प्रतिनिधि तथा कार्यकर्ताको उल्लेख्य उपस्थिति रहे पनि नेतृत्व चयन र निर्वाचन सम्बन्धी विषयमा भने औपचारिक छलफल अझै सुरु हुन सकेको छैन। व्यवस्थापकीय कामलाई प्राथमिकता दिइएकाले नेतृत्वको प्रतिस्पर्धाबारे बहस पछि हुने बताइएको छ।
