नेपाली कम्युनिस्ट पार्टी रूपन्देही प्रतिनिधिसभा निर्वाचन क्षेत्र नम्बर २ का उम्मेदवार विश्वदीप पाण्डे (शुभाष) सँग परियार सेवा समाज, लुम्बिनी प्रदेशको आयोजनामा भेटघाट तथा छलफल कार्यक्रम सम्पन्न भएको छ।
सोमबार बुटवलमा आयोजित कार्यक्रममा उम्मेदवार पाण्डेले दलित समुदायका हक–अधिकार सुनिश्चित गर्न ठोस र व्यवहारिक नीति आवश्यक रहेको बताए। उनले हक–अधिकारको संरक्षण र प्रवर्द्धनका लागि दलित समुदाय एकताबद्ध हुन जरुरी रहेको उल्लेख गरे। समता मुलक समाज निर्माण र दलित समुदायका समस्याको समाधानका लागि आफू दलित अगुवाहरूलाई साथमा लिएर स्थानीय तहदेखि प्रधानमन्त्रीको टेबुलसम्म आवाज बुलन्द गर्ने प्रतिबद्धता जनाए।
‘म भोट मात्र होइन, तपाईंहरूको मन पनि माग्न आएको हुँ,’ पाण्डेले भने।
दलित समुदायका शिक्षा, स्वास्थ्य, रोजगारी तथा आर्थिक सशक्तीकरणका क्षेत्रमा राज्यको ध्यानाकर्षण गराउन आफूले सक्ने कुनै कसर बाँकी नराख्ने उनको भनाइ थियो। यसका लागि ठोस तथा व्यवहारिक नीति निर्माणमा सहजीकरण गर्ने प्रतिबद्धता उनले व्यक्त गरे।
कार्यक्रममा उपस्थित समुदायका अगुवाहरूले राज्यको वर्तमान नीतिले दलित समुदायको वास्तविक आवश्यकता सम्बोधन गर्न नसकेको गुनासो गरे। उनीहरूले समुदायका लागि विशेष सहयोग कार्यक्रम सञ्चालन गर्नुपर्ने, सिलाइ व्यवसायजस्ता आत्मनिर्भर कार्यक्रमका लागि सहुलियतपूर्ण ऋण उपलब्ध गराउनुपर्ने माग राखे। साथै, सीटीईभीटी अन्तर्गत सीपमूलक तालिममा सुनिश्चित पहुँच, कक्षा १२ सम्म निःशुल्क शिक्षा, आर्थिक सशक्तीकरणका लागि एक करोड रुपैयाँसम्म लगानी गर्न पाउने नीति, कर छुट व्यवस्था तथा बैंकबाट सहज कर्जा प्रवाह हुनुपर्नेमा जोड दिए।
आपतकालीन सेवाका लागि एम्बुलेन्स व्यवस्था र दीर्घकालीन समाधानका रूपमा टेक्निकल कलेज स्थापना अपरिहार्य रहेको वक्ताहरूको भनाइ थियो। अभियन्ताहरूले “दलित” शब्दको सीमाभन्दा माथि उठेर सम्मान, समानता र अवसरको अधिकार सुनिश्चित गर्न राज्य गम्भीर हुनुपर्नेमा जोड दिएका छन्।
वक्ताहरूले जनयुद्धका बलिदानका कारण आज दलित समुदायले अधिकार प्राप्त गरेको इतिहास स्मरण गर्नुपर्नेमा समेत जोड दिए।
निर्मल सुनमको अध्यक्षतामा सम्पन्न कार्यक्रममा नेकपाका युवा नेता सुजित बिक, राजु बराह, प्रकाश परियार, महेन्द्र भुसाल, नरेन्द्र दर्जी, रोमकान्त बराहलगायत परियार समाजका अगुवाहरूको उपस्थिति रहेको थियो।
