रुपन्देही २ मा नेकपाको ७ सय १७ सदस्यीय निर्वाचन परिचालन समिति

आगामी फागुन २१ गते हुने प्रतिनिधिसभा निर्वाचनलाई लक्षित गर्दै नेपाली कम्युनिष्ट पार्टी (नेकपा) ले रुपन्देही निर्वाचन क्षेत्र नं. २ मा ७ सय १७ सदस्यीय निर्वाचन परिचालन समिति गठन गरेको छ ।

नेपाली कम्युनिष्ट पार्टीका नेता नारायण जी.सी. ‘निर्मल’को संयोजकत्वमा गठन गरिएको समितिको सह–संयोजकमा कमल बस्याल रहेका छन् भने निर्देशक, अनुगमन तथा मत सर्वेक्षण समितिको संयोजकको जिम्मेवारी पार्टीका केन्द्रीय सदस्य राम परियारलाई दिइएको छ ।

रुपन्देही क्षेत्र नं. २ का उम्मेदवार सुभाष पाण्डे ‘विश्वदीप’ले परम्परागत दलहरूको असफलता र निराशाजनक शासनशैलीका कारण जनताले नयाँ राजनीतिक विकल्प खोजिरहेको बताएका छन् । उनले फागुन २१ गतेको निर्वाचन केवल सांसद चयन गर्ने प्रक्रिया मात्र नभई देशलाई सही दिशामा लैजाने ऐतिहासिक अवसर भएको उल्लेख गरे ।

उनले भने, “कांग्रेस र एमालेको पालो–पालोको शासनले जनताको भरोसा गुमाइसकेको छ । अब युवाको नेतृत्व, स्पष्ट दृष्टिकोण र इमानदार राजनीतिमार्फत विकास र सुशासनको नयाँ अध्याय सुरु गर्न जरुरी छ ।”

विश्वदीपले रुपन्देही २ लाई विकास, रोजगारी र सामाजिक न्यायको नमुना क्षेत्र बनाउने प्रतिबद्धता व्यक्त गर्दै जनताको अधिकार सुरक्षित गर्दै शिक्षा, स्वास्थ्य, पूर्वाधार र रोजगारीलाई प्राथमिकतामा राखेर काम गर्ने बताए ।

“जनताको मतको सम्मान गर्दै विकास निर्माणको अभिभारा पूरा गर्न फागुन २१ गते नेकपालाई विजयी गराउन म सबै मतदातासँग आग्रह गर्दछु,” उनले जोड दिए ।

नेपाली कम्युनिष्ट पार्टीले बिहीबार बुटवलमा आयोजित कार्यक्रममा निर्वाचन परिचालन समितिको औपचारिक घोषणा गर्दै फागुन २१ गतेको निर्वाचन नियमित संसदीय निर्वाचन मात्र नभई जेन–जी आन्दोलनले निम्त्याएको विशेष निर्वाचन भएको उल्लेख गर्दै सम्पूर्ण शक्ति परिचालन गर्न कार्यकर्तालाई निर्देशन दिएको छ ।

कार्यक्रममा बोल्दै नेपाली कम्युनिष्ट पार्टीका नेता एवं पूर्वमन्त्री चक्रपाणी खनाल ‘बलदेव’ले कांग्रेस, एमाले र नयाँ भनिएका दलहरूको गतिविधिका कारण मुलुक संकटतर्फ धकेलिएको दाबी गर्दै सम्भावित दुर्घटनाबाट देशलाई जोगाउन नेकपा प्रतिबद्ध रहेको बताए । उनले रुपन्देहीका उम्मेदवारहरू आफ्नै एजेण्डा र जनसमर्थनका आधारमा विजयी हुने दाबीसमेत गरे ।

राजनीतिक विश्लेषक युग पाठकले निर्वाचनभन्दा ठूलो लडाइँ देशलाई सम्भावित दुर्घटनाबाट जोगाउनु भएको उल्लेख गरे । कार्यक्रममा नेकपाका केन्द्रीय सदस्यहरू राम परियार, महेन्द्र अर्याल, मजदुर नेता चिनबहादुर गुरुङ, नेतृ रिज्जु श्रेष्ठलगायतले मन्तव्य व्यक्त गरेका थिए।

रुपन्देही निर्वाचन क्षेत्र नं. २ अन्तर्गत बुटवल उपमहानगरपालिकाका वडा नं. १ देखि १३, तिलोत्तमा नगरपालिकाका वडा नं. १ देखि ६ तथा सैनामैना नगरपालिकाका वडा नं. १ देखि ४ सम्म पर्दछन् ।