लुम्बिनी निर्माण व्यवसायी संघ, रुपन्देहीको १९औँ वार्षिक साधारण सभा आगामी पौष २४ गते बिहीबार भैरहवास्थित होटल पोवा मा आयोजना हुने भएको छ।
संघका अनुसार साधारण सभाको समुद्घाटन नेपाल निर्माण व्यवसायी महासंघका अध्यक्ष रवि सिंहको प्रमुख अतिथिको रूपमा गर्ने कार्यक्रम तय भएको छ। कार्यक्रममा निर्माण व्यवसायी क्षेत्रका प्रतिनिधि, सरोकारवाला निकाय तथा अतिथिहरूको सहभागिता रहनेछ।
कार्यक्रम बिहान ९ बजेदेखि सुरु हुनेछ। साधारण सभामा संघको वार्षिक प्रगति प्रतिवेदन प्रस्तुत गरिने, आर्थिक विवरण अनुमोदन गरिने तथा आगामी कार्ययोजना र समसामयिक विषयमा छलफल हुने जनाइएको छ।
संघका अध्यक्ष मन्जु भुसालले साधारण सभाको महत्व औँल्याउँदै भने,“निर्माण व्यवसाय क्षेत्रले भोगिरहेका समस्या, अवसर र चुनौतीहरूबारे साझा धारणा बनाउने र संस्थालाई अझ सुदृढ बनाउने दिशामा यो साधारण सभा महत्वपूर्ण हुनेछ। सबै सदस्यहरूको सक्रिय सहभागिताले मात्र संघलाई थप बलियो बनाउन सकिन्छ,” । उनले सबै सदस्य, सरोकारवाला निकाय र अतिथिहरूलाई कार्यक्रममा उपस्थित भई साधारण सभालाई सफल बनाउन आग्रह गरेकि छन ।
