रुपन्देहिमा केन्द्रीय कार्यालय रहेको ‘ख’ बर्गको शाइन रेसुङ्गा डेभलपमेन्ट बैंक १७औँ वर्षमा प्रवेश गरेको छ। बैंकको अधिकृत पुँजी ८ अर्ब, जारी पुँजी ४ अर्ब ८७ करोड र चुक्ता पुँजी पनि ४ अर्ब ८७ करोड रुपैयाँ रहेको छ। २०८१ पुस मसान्तसम्मको वित्तीय विवरण अनुसार बैंकको निक्षेप संकलन ६९ अर्ब ७२ करोड रहेको छ भने कर्जा लगानी ५७ अर्ब ४९ करोड रुपैयाँ पुगेको छ।
बैंकले विभिन्न क्षेत्रका लागि कर्जा प्रवाह गर्दै आएको छ। व्यापार, कृषि, आवास निर्माण, विपन्न वर्ग, जग्गा खरिद, होटल तथा पर्यटन, उद्योग, उपभोग्य कर्जा, हायरपर्चेज, अस्पताल, शिक्षा लगायतका क्षेत्रमा बैंकले लगानी गरेको छ। उपभोक्ताको आवश्यकतालाई ध्यानमा राख्दै बैंकले डिजिटल कारोबारलाई प्रवर्द्धन गर्दै सुरक्षित र भरपर्दो सेवा दिने लक्ष्य राखेको छ।
आर्थिक वर्ष २०८०/०८१ मा बैंकले ब्याजकर, पारिश्रमिक करलगायत विभिन्न शीर्षकमा ३५ करोड ५७ लाख ८० हजार रुपैयाँ तथा आयकरतर्फ ३७ करोड ६ लाख ६६ हजार रुपैयाँ गरी कुल ७२ करोड ६४ लाख ४६ हजार रुपैयाँ सरकारी कोषमा जम्मा गरेको छ।
बैंकले वित्तीय व्यवस्थापनमा उत्कृष्टता प्रदर्शन गर्दै विभिन्न राष्ट्रिय तथा अन्तर्राष्ट्रिय सम्मान प्राप्त गरेको छ। इण्डियन च्याम्बर अफ कमर्सद्वारा आयोजित दोस्रो इमर्जिङ एशिया बैंकिङ अवार्डमा ‘बेस्ट परफमेन्स अन प्रोफिटाबिलिटी’, ‘बेस्ट परफमेन्स अन ग्रोथ’ र ‘बेस्ट बैंक’ शीर्षकमा रनर उपाधि प्राप्त गरेको बैंकले नेपाल चार्टर्ड एकाउन्टेन्ट्स संस्थाद्वारा आयोजित नेशनल बेस्ट प्रेसिडेन्टल एनुअल रिपोर्ट अवार्ड २०२३ मा ‘सर्टिफिकेट अफ मेरिट’ तथा न्यु बिजनेस एज प्रा.लि.बाट ‘बेस्ट म्यानेज्ड डेभलपमेन्ट बैंक अफ दि इयर २०२४’ को सम्मान प्राप्त गरेको छ।
बैंकका अध्यक्ष थानेश्वर पौडेलले निक्षेप तथा कर्जा लगानीलाई सन्तुलित रूपमा वृद्धि गर्दै ग्रामीण क्षेत्रमा कृषि, साना तथा मझौला उद्यममा लगानी विस्तार गर्ने योजना रहेको बताएका छन्। उनले कर्जाको गुणस्तरमा विशेष ध्यान दिँदै डिजिटल कारोबारलाई थप सुरक्षित बनाउन पहल गरिरहेको उल्लेख गरे।
प्रमुख कार्यकारी अधिकृत प्रकाश पौडेलले लुम्बिनी प्रदेशको एकमात्र राष्ट्रियस्तरको विकास बैंकका रूपमा शाइन रेसुङ्गा डेभलपमेन्ट बैंकलाई अझ सशक्त र सेवाग्राहीमुखी बनाउने प्रतिबद्धता व्यक्त गरे। बैंकले सुशासन, स्पष्ट भिजन र वित्तीय अनुशासनलाई मुख्य प्राथमिकता दिएको भन्दै उनले वित्तीय अनुशासनको अभावले बैंकिङ क्षेत्रमा असर पर्ने स्मरण गराए।
बैंकले १७औँ वार्षिकोत्सवको अवसरमा यस वर्ष उत्कृष्ट शाखाका रूपमा गुल्मीको खैरेनी, बर्दियाको कतरनिया, रुपन्देहीको सूर्यपुरा, प्युठानको बिजुवार र रुपन्देहीकै योगीकुटी शाखालाई ‘बेस्ट म्यानेज्ड ब्रान्च अवार्ड’ प्रदान गरेको छ।
यसै अवसरमा, नेपाल पत्रकार महासंघ रुपन्देहीसँग सहकार्य गरी स्थापना गरिएको ‘शाइन आर्थिक पत्रकारिता पुरस्कार’ बाट पत्रकार दामोदर खनाललाई सम्मानित गरिएको छ। खनाललाई ५० हजार १११ रुपैयाँ राशिको पुरस्कार प्रदान गरिएको हो। अर्थशास्त्रका प्राध्यापक डा. बाबुराम ज्ञवाली संयोजक रहेको छनोट समितिको सिफारिसमा नेपाल पत्रकार महासंघले खनाललाई पुरस्कार प्रदान गर्ने निर्णय गरेको थियो।
पुरस्कार प्राप्त गरेपछि पत्रकार खनालले आर्थिक क्षेत्र समस्यामा परिरहेको वर्तमान अवस्थामा सबै सरोकारवालाले मिलेर अर्थतन्त्र सुधारका लागि पहल गर्नुपर्ने बताए। नेपाल पत्रकार महासंघ रुपन्देहीका अध्यक्ष दिनेश पाण्डेले बैंकलाई जनताको माया प्राप्त भएको भन्दै भविष्यमा थप प्रगति हुने कामना गरे।
