शिक्षा र खेलकुदलाई सँगसँगै लैजानु पर्छ: अध्यक्ष विष्ट

राप्ती गाउँपालिका, दाङका अध्यक्ष प्रकाश विष्टले शिक्षा र खेलकुदलाई सँगसँगै जोड्दै अगाडि लैजानुपर्नेमा जोड दिनुभएको छ।शनिबार राप्ती गाउँपालिका-२, लालमटियास्थित गोरखा आइडियल स्कूलले वार्षिक कार्यतालिका अनुसार आयोजना गरेको खेलकुद सप्ताहको समापन कार्यक्रममा बोल्दै अध्यक्ष विष्टले खेलकुद पनि शिक्षाको अभिन्न हिस्सा भएको बताउनुभयो। उहाँले विद्यालय स्तरबाटै खेलकुदमा राम्रो प्रशिक्षण दिन सके राष्ट्रिय मात्र होइन, अन्तर्राष्ट्रिय स्तरका खेलाडी उत्पादनमा योगदान पुग्ने विश्वास व्यक्त गर्नुभयो।

अध्यक्ष विष्टले विद्यालय जीवनमा पढाइसँगै खेल र सिर्जनात्मक गतिविधिहरूलाई प्रोत्साहन गर्नुपर्ने बताउँदै, खेलकुद सर्वसाधारणका छोराछोरीको अधिकारको रूपमा विकास गर्नुपर्नेमा जोड दिनुभयो।विद्यालयका प्रधानाध्यापक बसन्त पुनका अनुसार नर्सरीदेखि कक्षा १० सम्मका विद्यार्थीले भाग लिएको खेलकुद सप्ताहमा २५ भन्दा बढी विधाका खेलहरू समावेश गरिएका थिए। प्रतियोगिताका विजेता विद्यार्थीहरूलाई शिल्ड, मेडल, र प्रमाणपत्र प्रदान गरिएको थियो।

कार्यक्रम गोरखा ग्रुपका अध्यक्ष मान बहादुर बुढाको अध्यक्षतामा र राप्ती गाउँपालिकाका अध्यक्ष प्रकाश विष्टको प्रमुख आतिथ्यतामा सम्पन्न भएको थियो। कार्यक्रममा गोरखा ग्रुपका शिक्षा निर्देशक दुर्गा बहादुर केसी, गोरखा मोडेल सेकेन्डरी स्कुल लमहीका उपाध्यक्ष डोर बहादुर जिसी, राप्ती गाउँपालिकाका कार्यपालिका सदस्य रण बहादुर पुजाली, नीलसागर सेवा आश्रमका केन्द्रीय अध्यक्ष सरिता खनाल, अभिभावक श्यामलाल बराल, पत्रकार महेश रिजाल, तथा शिक्षक, विद्यार्थी, र अभिभावकहरूको उल्लेख्य सहभागिता रहेको थियो।