लुम्बिनी विकास काेषका उपाध्यक्ष प्रथम योल्मो खेन्पो (छिमे छिरिङ) डा. ल्हारक्याल लामाले लुम्बिनीकाे समग्र बिकासकाे लागी अब नयाँ ढंगले अगाडि बढ्ने बताए । लुम्बिनीमा पत्रकारहरू संगकाे परिचयात्मक तथा भेटघाट कार्यक्रममा बाेल्दै लुम्बिनी बिकासकाे लागी निरन्तर अगाडि बढ्ने र आफ्नै कार्यकालमा गुरूयाेजना सम्पन्न गर्ने बताउँदै लुम्बिनीकाे मायादेवी मन्दिर अशाेक स्तम्भ र लुम्बिनी सगँ जाेडिएका नवलपरासीकाे रामग्राम कपिलबस्तुकाे तिलाैराकाेट जस्ता ऐतिहासिक ठाउँकाे संरक्षण र संवद्धनका लागी काम गर्ने बताए ।
लुम्बिनीकाे मुख्य आकर्षण मायादेवी मन्दिरलाई पर्यटकिय आकर्षण बढाउन नयाँ डिजाइन र आकर्षक मन्दिरकाे रुपमा निर्माण गर्ने उद्देश्य रहेको उनको भनाइ छ । गुरुयोजनाको बाँकी काम, बुद्ध सर्किट निर्माण, रामग्राम, तिलौराकोट र देवदहको पुरातात्विक क्षेत्रको संरक्षण र विकासका लागि सबै सगँ सहकार्य गरी काम गर्ने बताए । उनले भने ‘म लुम्बिनी बनाउन लड्छु, जुध्छु, भिड्छु तर, नैतिकता गुमाउँदिन’ । उनले लुम्बिनी गुरुयोजनाका सम्बन्धमा र बिकास कोषको बिषयमा विभिन्न प्रश्न र गुनासाहरु उठेको बताउँदै त्यसलाई सम्बोधन गर्नेगरी अगाडि बढ्ने प्रतिबद्धता जनाए ।
संविधानसभा सदस्य, पूर्व अर्थराज्यमन्त्री समेत रहेका डा. लामाले आफ्नो क्षमतालाई लुम्बिनी बनाउन खर्चिने बताए । उनले आफूले जीवन नै बुद्ध धर्मका लागि अर्पण गरेको बताउँदै बाँकी रहेको जीवन सत्कर्ममा लगाउने गरी काम गरेर देखाउन आफू लुम्बिनीको उपाध्यक्ष बनेको जिकिर गरे । उपाध्यक्ष लामाले रूपन्देही, कपिलवस्तु र नवलपरासीमा रहेका बौद्ध क्षेत्रको विकासका लागि दीर्घकालीन योजना बनाएको बताए । उनले बौद्ध क्षेत्रको विकासका लागि आवश्यक रकम जुटाउन विश्व समुदायमा समेत पुग्ने बताए।
उपाध्यक्ष लामाले गुरुयोजनामा केही परिमार्जन गर्नुपर्ने अवस्था देखिएको बताउँदै त्यसका लागि युनेस्को, विभागीय मन्त्रालय र सरोकारवाला निकायसँग परामर्शमा गरिने बताए । ‘४५ वर्षअघि केन्जो टाँगेले बनाएको योजना हो, अहिले धेरै अवस्था फेरिएको छ, त्यसका कारण पनि परिमार्जन जरुरी छ’, उनले भने ।
‘अब केहि रकम जुटाएर गुरूयोजना सकाउनु छ, अहिले देशको बजेटमा नि समस्या छ’ उपाध्यक्ष लामाले भने –‘म बुद्ध धर्मको विश्व समुदायसँगै जोडिएको छु केही समयमा त्यो फोरममा म जानेछु र स्रोत जुटाउने कोसिस गर्ने छु ।’ उपाध्यक्ष लामाले कोषलाई सबै पक्षमा पारदर्शिता बनाउने प्रमुख उद्देश्य रहेको समेत बताए । त्यसमा साथ दिन बिकास काेषका कर्मचारी र पत्रकारहरुलाई अनुरोध समेत गरे । लुम्बिनीको जमिन, स्रोत, कर्मचारी, स्थानीय सहयोग सबै पारदर्शी बनाउने भन्दै उनले आफू कमाउन नभई लुम्बिनी बनाउन आएकाले सबैको साथ र सहयोग चाहिएको बताए ।
