तारमाथि पर्यटन खोज्दै बुटवल: संचालन हुँदै २ ठुला केवलकार

 विवश विष्ट, बुटवल ।
पर्यटन विकासमा लगानीकर्ताहरु आकर्षित भइरहेका छन । बुटवलमा पर्यटन विकासको सम्भावना प्रचुर मात्रामा रहेको केवलकारको निर्माणमा लगानीकर्ताहरु लागिरहेका छन । आफैंमा पर्यटकिय गन्तव्यको केन्द्र बिन्दु रहेको बुटवलमा थप पर्यटकीय क्षेत्र थप गरिदै छ । पछिल्लो समयमा बुटवलले तारमाथि पर्यटक खोज्ने क्रममा २ वटा केबलकारको निर्माण कार्य भइरहेको छ । बुटवलमा लुम्बिनी केवलकार र सिद्धार्थ केवलकार निर्माणको काम तीव्र पारिएको छ ।

लुम्बिनी केवलकार :
पाल्पाको ऐतिहासिक तथा पुरातात्विक क्षेत्र वसन्तपुर र नुवाकोट जोड्ने गरी बुटवलमा दुई केवलकार निर्माण भइरहेका छन् । लुम्बिनी आउने आन्तरिक तथा बाह्य पर्यटकलाई लक्षित गरी केवलकार निर्माण गर्न थालिएको हो । पाल्पाको तिनाउ गाउँपालिका–३ स्थित वसन्तपुर र वडा नं २ को नुवाकोटगढी जोड्न तिनाउ नदीको वारिपारी बेस स्टेशन राखेर बुटवलमा लुम्बिनी केवलकार र सिद्धार्थ केवलकार निर्माणको काम तीव्र पारिएको छ । तिनाउ नदीको पूर्वमा सिद्धार्थ राजमार्गसँगै बुटवल उपमहानगरपालिका–३ बमघाटमा आधार स्टेशन रहेको लुम्बिनी केवलकारको टप स्टेशन पाल्पाको तिनाउ–३ वसन्तपुरमा राखिने छ ।

रुपन्देहीको बुटवल उपमहानगरपालिका बमघाटदेखि पाल्पाको तिनाहूँ गाउँपालिका बसन्तपुर डाँडासम्म पुग्ने निर्माणाधीन लुम्बिनी केवलकार आगामी बैशाख महिनादेखि सञ्चालनमा आउने भएको छ ।

वसन्तपुरलाई पर्यटकीय गन्तव्यका रुपमा विकास गरी आन्तरिक तथा बाह्य पर्यटनको विकास गर्ने उद्देश्यले केवलकार निर्माण गर्न लागिएको लुम्बिनी केवलकार प्रालिका अध्यक्ष चन्द्रप्रसाद ढकाल बताउनुभयो । करिब ३ किलोमिटर लामो केवलकारपछि पुगिने बसन्तपुर डाँडामा होटल, मनोरञ्जन पार्क तथा मन्दिरसहितका संरचनाहरु निर्माण हुने भएका छन् । यहाँ आउने पर्यटकलाई बसाउनका लागि रिसोर्ट, पाँच तारे होटल र उद्यानसहितका संरचना बनाउने काम भइरहेको छ । पाल्पाको वसन्तपुर डाँडामा १५० कोठासहितको पाँचतारे होटल बन्दै छ । वसन्तपुरमा मनोरञ्जन पार्क, पिकनिक स्पटपनि रहने भएको छ । यस केवलकारको तत्कालीन प्रधानमन्त्री केपी शर्मा ओलीले २०७७ फागुन १ गते शिलान्यास गरेका थिए।

साढे ३ अर्ब रुपैयाँ बढी लगानीमा निर्माण भइरहेको लुम्बिनी केवलकारमा २५ वटा बाकसमा ८/८ जना चढ्न सकिने छ । १ घण्टामा ६०० यात्रु आवतजावत गर्न सक्ने छन् । यो केवलकार नियमितरुपमा सञ्चालनमा आए दैनिक ५ हजार व्यक्तिलाई ओहोरदोहार गराउन सकिने बताइएको छ ।

सिद्धार्थ केबलकार :
बुटवलमा संचालनमा आउन लागेको अर्को केबलकार सिद्धार्थ केवलकार छ । जसको निर्माण कार्य तिव्र गतिमा छ । तिनाउ नदी पश्चिममा पूर्वपश्चिम राजमार्गसँगै मणिमुकुन्द सेन उद्यान (फूलबारी)को उत्तरतर्फको शिखर देउराली वनमा आधार स्टेशन रहेको सिद्धार्थ केवलकारले पाल्पाको ऐतिहासिक एवं पुरातात्विक महत्वको नुवाकोटलाई जोड्नेछ । यो केवलकारको पनि आधार स्टेशन शिखर देउराली र पाल्पाको तिनाउँ गाउँपालिका–२ नुवाकोटमा पूर्वाधार निर्माणको कामलाई तीव्र बनाइएको छ । सिद्धार्थ केवलकारले सुविधा सम्पन्न रिसोर्ट बनाइरहेको छ ।

सिद्धार्थ केवलकार तत्कालिन अर्थमन्त्री विष्णुप्रसाद पौडेलले २०७७ फागुन ९ गते शिलान्यास गरेका थिए । १.९४ किमि लम्बाइ रहेको यो केवलकारको बेस स्टेसन नुवाकोट नजिकैको शिखर देउराली बनमा हुने छ। यहाँ बाल उद्यान, पर्यटन सूचना केन्द्र, शान्ति उद्यान, गुम्बा, भ्यूटावर, स्वास्थ्य केन्द्रलगायत संरचना बन्नेछन् । नियमितरुपमा केवलकार सञ्चालनमा आउँदा दैनिक ५ हजार यात्रु ओहरदोहर गर्न सक्ने सिद्धार्थ केवलकारका अध्यक्ष ई राजेन्द्रसिंह गुरुङले बताउनुभयो ।

दुई ठुला पर्यटकिय गन्तव्य पाउन लागेको बुटवलले यी केवलकार संचालनपछि पर्यटकिय व्यवसाय फस्टिदै यहाँको जिवनस्तरमा थप उकालो लाग्ने छ ।