एलिना चौहानले गएको धोकेबाज भाईरल भएपछी शिव परियार भन्छन- ‘धोकेबाज’ गीत मैले गाएको हो

काठमाडौं । धोकेवाज गीतले गायिका एलिना चौहानलाई रातारात हिट बनाइदियो । उनी अहिले ‘धोकेवाज गायिका’ को नामले नै चर्चित हुन थालेकी छन् भने मेला–महोत्सवदेखि विदेशका कार्यक्रममा उनको डिमान्ड ह्वात्तै बढेको छ ।

यता, धोकेवाजको ‘मेल भर्सन’ गाउने शिव परियार भने खासै चर्चामा आउन सकेनन् । धेरै स्रोता–दर्शकलाई यो गीत शिवले पनि गाएका छन् भन्नेसमेत थाहा छैन । अहिले उनी आफैंले यो गीतको गायक म पनि हुँ भन्दै हिँड्नुपर्ने अवस्था छ । हरेक स्टेजहरुमा उनी अहिले धोकेवाज गीतलाई प्राथमिकतामा राख्छन् ।

साथै, प्रत्येक इन्टरभ्यूहरुमा पनि यो गीत आफ्नो स्वरमा सुनाउने गर्छन् । ‘धोकेबाज हौ तिमी’ गीतको फिमेल भर्सन यतिबेला सबैभन्दा बढी भाइरल हुनेमध्ये पर्छ । टिकटकदेखि फेसबुक र इन्स्टाग्रामको रिल्ससम्म यो गीत व्यापक सेयर भइरहेको छ । नेपाली मात्र होइन, विदेशीले समेत यो गीतको कन्सर्टका दृश्यलाई सेयर गरिरहेका छन् ।

यो गीतलाई लिएर गायिका एलिना चौहान समेत चर्चामा छिन् । पछिल्लो समय जिल्ला-जिल्लामा भइरहेका मेला-महोत्सवमा समेत यो गीत चर्चामा छ । कतिपयले एलिनालाई ‘धोकेबाज हौ’ गायिकाको रुपमा समेत चित्रण गर्न थालेका छन् । राजनीतिक सन्दर्भमा समेत गीतलाई लिएर ट्रोल बनिरहेको छ ।

करिब दुई वर्षअघि नै शिव परियारको आवाजमा रिलिज भएको मेल भर्सनभन्दा पछि एलिनाको स्वरमा आएको फिमेल भर्सन चर्चामा आएको छ । तर यो गीतले शिवलाई समेत पुनः चर्चामा तानेको छ । शिवले ‘टाइटलमा नजानुस् है कृपया अन्तर्वार्ता राम्रो छ’ भन्दै एक टेलिभिजन अन्तर्वार्तालाई सेयर गरेका छन् जसको टाइटल छ- ‘धोकेबाज गीत मैले गाएको हो । धोकेबाजले मलाई फेरि चर्चामा ल्यायो ।’

शिवको उक्त टेलिभिजन अन्तर्वार्ता हेर्दा लाग्छ, ‘धोकेबाज हौ तिमी’ गीतलाई लिएर शिव र एलिनाबीच अप्रत्यक्ष रुपमा जस लिने होड चलेको देखिन्छ । शिवले खुलेर नभनेपनि उनले अन्तर्वार्तामा आफूले गाएको उक्त गीतको मेल भर्सनले अहिले पनि चर्चा बटुलेको बताएका छन् । साथै, एलिनाले गाएको गीत हिट हुनुमा कन्सर्टमा देखिएको दृश्य र एक्सप्रेसन प्रमुख रहेको अर्थ्याउन खोजेका छन् ।

साथै उनले टाइमलाइनमा भिडियो पनि सेयर गरेका छन् । शिवको स्वर रहेको उक्त गीतको मेल भर्सनलाई युट्युबमा ८३ लाख पटक हेरिएको छ भने एलिनाको गीतलाई २ करोड ३९ लाख पटक हेरिएको छ । धोकेवाद गीत एक वर्षअगाडि नै आएको हो ।

सुवास कार्कीको रचना र संगीत रहेको गीतमा एलिना चौहानले स्वर दिएकी थिइन् । २०७८ को वैशाखमा यूट्यूवमा अपलोड भएको गीत सुपरहिट भयो । भिडियोमा एलिना स्वयंले अभिनय गरेकी छिन् भने उनलाई बादलसिंह ठकुरीले साथ दिएका छन् । गीतले छिट्टै लोकप्रियता पाएपछि तीन महिनापछि मेल भर्सनमा रेकर्ड गरिएको हो, जसलाई शिव परियारले स्वर दिएका छन् ।

गीतको शब्द र संगीत उही छ । गीतले राम्रै भ्यूज बटुले पनि फिमेल भर्सनभन्दा धेरै पछाडि छ । पछिल्लो समय एकाएक धोकेवाज गीत भाइरल भयो । त्यसो त शिव परियार चर्चाको लागि कुनै अमुक गीतको सहारा लिनुपर्ने गायक होइनन् । उनी नेपाली संगीत क्षेत्रका स्थापित गायक हुन् । धोकेवाज बाहेक पनि उनले थुप्रै हिट गाइसकेका छन् ।