काठमाडौमा ट्याङ्करको ठक्करबाट स्कुटर चालकको मृत्यु

काठमाडौँ- काठमाडौँको स्वयम्भूमा ट्याङ्करको ठक्करबाट स्कुटर चालकको मृत्यु भएको छ । काठमाडौँ महानगरपालिका-१५ स्वयम्भू चमतीमा प्रदेश प्रदेश ३-०१-००३ क ७५१२ नम्बरको ट्याङ्करले बा ८१ प १७८६ नम्बरको स्कुटरलाई ठक्कर दिँदा स्कुटर चालक काठमाडौँ महानगरपालिका-२४ बस्ने ५५ वर्षीय नरेन्द्रमुनी बज्राचार्यको मृत्यु भएको हो ।

दुर्घटनामा परी गम्भीर घाइते हुनुभएका बज्राचार्यको महमोहन अस्पताल स्वयम्भूमा उपचारका क्रममा गएराति मृत्यु भएको काठमाडौँ उपत्यका ट्राफिक प्रहरी कार्यालयका प्रवक्ता, प्रहरी वरिष्ठ उपरीक्षक राजेन्द्रप्रसाद भट्टले जानकारी दिनुभयो । दुर्घटनामा सङ्लग्न चालकलाई प्रहरीले नियन्त्रणमा लिएको प्रवक्ता भट्टले बताउनुभयो ।

यो पनि/ अन्य समाचार- पोखरामा फेरि २ जनाले गरे आत्मदाह, इलामका प्रेमप्रसाद आचार्यले काठमाडौँमा आत्मदाह गरेको घटना नसेलाउँदै पोखरामा दुई जनाले आत्मदाह प्रयास गरेका छन् । पोखरा महानगरपालिका— १३ मा पर्ने काहुँखोलामा २ जनाले आत्मदाह गरेको बताइएको छ ।

यसरी आत्मदाहको प्रयास गर्नेमा काहुँखोलाकै स्थानीय बासिन्दा संगीता सापकोटा र कृष्णबहादुर क्षेत्री रहेको जिल्ला प्रहरी कार्यालय कास्कीले जनाएको छ । तर उनीहरुलाई जल्दै गरेको अवस्थामा तत्कालै छिमेकीहरुले उद्धार गरेका थिए । स्थानीयका अनुसार क्षेत्रीले बाथरुमभित्र पसेर आफ्नै शरीरमा पेट्रोल हाली आगो लगाएका थिए ।

उनलाई जोगाउन जाँदा सापकोटाको शरीरमा पनि आगो लागेको बताइएको छ । अहिले दुवै जनाको पश्चिमाञ्चल क्षेत्रीय अस्पतालमा उपचार भइरहेको बताइएको छ । क्षेत्रीले के कारणले आगो लगाए भन्ने तथ्य खुल्न सकेको छैन । प्रहरी घटना विवरण अध्ययन गरिरहेको बताइएको छ ।