पाँचथरको फाल्गुनन्द गाउँपालिका-४ चिलिङदिनमा जंगलमा भेटिएको ग्रिनेट खेलाउने क्रममा पड्केर ८ वर्षीय बालक घाइते भएका छन् । स्थानीय पुरानो पञ्चमी बजार नजिकै भेटिएको ग्रिनेट शनिबार बिहान साढे ११ बजे पड्किँदा स्थानीय मनोज खड्काका छोरा निरज घाइते भएको प्रहरीले जनाएको छ ।
इलामको फाकफोकथुम-१ र पाँचथरको फाल्गुनन्द गाउँपालिका-४ को सिमानामा पर्ने पुरानो पञ्चमी बजारदेखि पाँच सय मिटर तल चिलिङदिनको जंगलमा साथीसँग दाउरा खोज्न गएका खड्काले ग्रिनेट फेला पारेका थिए ।
हरियो डल्लो भेटेर खेलाउने क्रममा विष्फोट भएर ती बालक घाइते भएका पाँचथरका प्रहरी प्रमुख (डिएसपी) हरि खतिवडाले जानकारी दिए । खिया लागेको अवस्थामा भेटिएको ग्रिनेट द्वन्द्वकालीन समयमै छोडिएको हुनसक्ने प्रहरीको अनुमान छ ।
दायाँ छाती, पेट र अनुहारमा लागेको घाउबाट रगत बगिरहेको अवस्थामा उद्धार गरिएका बालकलाई उपचारका लागि झापातर्फ पठाइएको स्थानीयले जनाएका छन् ।
