मन्त्री आलेको निर्देशनले विमानस्थलमा हंगामा, नेपाल छोडेर भाग्न खोजेकाहरु पक्राउ पर्दै

माघ  : संस्कृति, पर्यटन तथा नागरिक उड्डयनमन्त्री प्रेमबहादुर आलेको निर्देशनमा मन्त्रालयले एसएचएल म्यानेजमेन्ट प्रालीका निमित्त प्रमुखकार्यकारी अधिकृत माइक बोल्सोभरलाई नेपाल छोड्न रोक लगाइएको छ । क्यासिनो सञ्चालन गरेबापत उनले नेपाल सरकारलाई रु १३ करोड राजस्व तिर्नुपर्ने देखिए पनि हालसम्म नतिरी भाग्न लागेकाले मन्त्री आले र मन्त्रालयका सचिव महेश्वर न्यौपानेको निर्देशनमा गएराति १० बजे साउथ अमेरिका उड्न लागेका क्यासिनोका निमित्त सिइओ बोल्सोभरलाई विमानस्थलबाटै नियन्त्रणमा लिइएको बताइएको छ ।

उनले ओसिपी एसियाको लगानीमा काठमाडौँको लाजिम्पाटस्थित साङ्ग्रिला होटल र भैरहवास्थित टाइगर प्यालेसमा सञ्चालित दुई क्यासिनोको राजस्व तिरेका थिएनन् । बोल्सोभरले सञ्चालन गरेका दुई वटा क्यासिनोले प्रतिक्यासिनो रु छ करोड ५० लाखका दरले दुई क्यासिनोको रु १३ करोड पुस मसान्तभित्र दाखिला गर्नुपर्नेमा अटेर गरी भाग्न लागेको थाहा पाएपछि रोक लगाइएको हो ।

मन्त्री आलेको निर्देशन पछि सञ्चालनमा रहेका आठ क्यासिनो कम्पनीले कम्तीमा पनि रु ४० करोड सरकारको खातामा राजस्व दाखिला गरिसकेका छन् भने एसएचएल म्यानेजमेन्ट प्राइभेट लिमिटेडले भने रु १३ करोड राजस्व नबुझाएको बताइएको छ । एसएचएल म्यानेजमेन्ट प्राइभेट लिमिटेडले तिलोत्तमा नगरपालिका-६ भैरहवामा २३ कठ्ठा सरकारी जग्गामा पाँच तारे होटल गैरकानुनी ढङ्गले सञ्चालन गरेको आरोप छ ।

सर्वोच्च अदालतले समेत उक्त कम्पनीलाई कुनै कारोबार नगर्न आदेश दिएको थियो । सर्वोच्चको आदेशविपरीत क्यासिनो र होटल सञ्चालन गर्दै आएको उक्त कम्पनीका सिइओ बोल्सोभर राजस्व नबुझाएर मध्यरातमा नेपाल छोड्दै गर्दा पक्राउ परेका हुन् ।

यस्तै, संस्कृति,पर्यटन तथा नागरिक उड्डयनमन्त्री प्रेम आलेले पशुपतिनाथ क्षेत्र परिसरमा बनाइएको धर्मशाला देखेर चकित भएका छन् । आइतवार विहान पशुपतिनाथ मन्दिर स्थित धर्मशालामा अनुगमनमा गएका मन्त्री आलेले आफु चकित भएको प्रतिकृया दिएका हुन् । वतास समुहले काम गरेका हरेक क्षेत्रमा निगरानी बढाएका मन्त्री आले आइतवार पशुपति क्षेत्र पुगेका थिए ।

त्यहाँ मन्दिर दर्शनका लागि आउनेहरुको सुविधाको लागि धर्मशाला निर्माण गरिएको छ । बतास अर्गनाइजेशनले व्यवस्थापनको जिम्मेवारी लिएको धर्मशालाको निरीक्षणपछि मन्त्री आलेले ‘धर्मशाला त सेभेन स्टार होटेल’ जस्तो भन्दै आफू स क्ड भएको बताएका हुन् । धर्मशालाको सुविधा निकै महंगो भएको भन्दै गुनासो आएपछि मन्त्री आफै अनुगमनमा पुगेका हुन् ।

छानबिन समितिले भोलि प्रतिवेदन बुझाएपछि सबै सत्यतथ्य बाहिर ल्याउने मन्त्रीले जानकारी गराएका छन् । यस्तै उहाँले धर्मशाला सस्तो र सर्वसुलभ हुनुपर्नेमा एउटा कोठामा एक जना बस्दा ५ हजार ५ सय र दुई जना बस्दा ११ हजार रुपैयाँ लिने गरिएको देखिएको उनले बताए । आफूले कसैसँग राजनीतिक प्रतिशोध नसाँधेको उनको भनाइ छ । जोसुकैले गलत गरेको भए पनि कारबाही गरेरै छाड्ने मन्त्री आलेले प्रतिबद्धता जनाएका छन् ।

धर्मशाला हातामा बतास समूहले पूराना सवारी साधनको प्रदर्शनीसमेत गर्दै आएको छ । विशेषगरी पूरातात्विक महत्वका सम्पदा क्षेत्रमा आफ्नो व्यवसाय बिस्तार गर्दै आएको समूहले नारायणहिटीमा सञ्चालन गर्न खोजेको कफी शप सर्वाधिक विवादमा आए पछि वतास समुहले गरेका ब्यवसायीक क्षेत्रको निगरानी बढाइएको छ ।

बतास समूहले पशुपति क्षेत्र विकास कोषसँग मिलेमतो गरेर १९ रोपनी जग्गा र त्यसमा फैलिएको ३४ करोड लागतको ८८ कोठे धर्मशाला होटल भाडामा लिएको छ । धर्मशाला भाडामा लिएर महँगो होटल चलाएको भन्दै बतास समूहको आलोचना भएपछि मन्त्री आले निरिक्षणमा पुगेका हुन् ।