काठमाडौं, मंसिर ३ :- विधाताले रचेको विधिको विधानलाई कसैले टार्न नसक्ने रहेछ, आउने र जाने तिथि र मितिको पनि यो दुनियाँमा कसैलाई पत्तो नहुने रहेछ, कतिखेर यो धर्तीमा पदार्पण गराउने र कतिखेर धर्तीबाट पुनः नभमै विलीन गराउने यसको हिसाबकिताब र समय तालिका मान्छेको वशमा वा मान्छेको हातमा नहुने रहेछ।
हृदयाघात हुँदा नेपाल समाचारपत्र राष्ट्रिय दैनिकका सिन्धुपाल्चोक जिल्ला संवाददाता नानीराम नेपालको बिहीबार निधन भएको छ । धुलिखेल अस्पतालमा साँझ ५ः३० बजे उहाँको निधन भएको हो ।
बलेसी गाउँपालिका-४ घर भएका ३१ वर्षीय नेपाललाई बिहीबार दिउँसो २ः१० मा खाडीचौरमा रहेका बेला एक्कासि हृदयाघात भएको थियो । तत्काल न्यु सदाबहार हस्पिटल खाडीचौरमा पुर्याउँदा त्यहाँ उपचार हुन नसकेपछि उहाँलाई धुलिखेल अस्पताल रिफर गरिएको थियो ।
‘दोलालघाट आइपुग्दा उहाँको बोली हरायो’, काभ्रे संवाददाता मोतीराम तिमल्सिनाले भन्नुभयो– ‘४ बजे धलिखेल अस्पताल ल्याइ पुर्याएका थियौं, ५ः३० मा डाक्टरले मृत छोषणा गरे ।’ नेपालको परिवारमा आमा–बुबा, श्रीमती सुशीला तथा ६ वर्षीया छोरी र डेढ वर्षीय छोरा रहेका छन् ।
उहाँ पत्रकार महासंघ सिन्धुपाल्चोकको सहसचिव पनि हुनुहुन्थ्यो । त्यस्तै, अल्पाउमै संसार छाडेको उहाँका आत्माको चिरशान्तिको कामना तथा शोक सन्तप्त परिवारजनमा धैर्यधारण गर्ने शक्ति मिलोस् भन्दै बिहीबारै नेपाल पत्रकार महासंघ कामना प्रतिष्ठान शाखाले शोक विज्ञप्ति जारी गरेको थियो ।
