बुटवल– फागुन २३ गतेदेखि समुदायस्तरमा कोभिड १९ विरुद्धको खोप अभियान सुरु हुँदैछ। त्यसअघि बुटवल उपमहानगरपालिकाले सबै १९ वटै वडामा जोखिमयुक्त समूहमा कोभिड एन्टिजेन परीक्षण सुरु गर्दैछ। एन्टिजेन परीक्षण र खोप अभियानलाई प्रभावकारी बनाउन सोमबार स्वास्थ्यकर्मीहरुको लागि अभिमुखीकरण कार्यक्रम गरिएको छ।
कार्यक्रममा बुटवल उपमहानगरका प्रमुख शिवराज सुवेदीले सहज एवम् विश्वसनीय सेवाप्रदान गर्न आग्रह गरे। उनले जनस्वास्थ्यको संवेदनशीलतालाई मध्यनजर गर्दै सोही अनुरुप खोप अघि तथा पछिको अवस्थाको आँकलन गरेर तयारी पूरा गर्न निर्देशन दिए।
उपमहानगरका सहरी स्वास्थ्य केन्द्र, सहरी स्वास्थ्य प्रवद्र्धन केन्द्र तथा स्वास्थ्य चौकीहरुमा खोप कार्यक्रम सञ्चालन हुने छ । यस्तै लुम्बिनी प्रादेशिक अस्पताल र सिद्धार्थ बाल तथा महिला अस्पतालहरुसमेत गरि १० स्थानमा उपमहानगरको खोप केन्द्र रहने छ ।
खोप कार्यक्रमका लागि उपमहानगरका करिब ७० जना तालिमप्राप्त स्वास्थ्यकर्मीहरु खटिने छन् भने उनीहरुलाई सघाउन वडा स्तरमा वडा अध्यक्षको संयोजकत्वमा वडा खोप समन्वय समिति समेत गठन गरिएको उपमहानगरका अनुमगन समितिका संयोजक समेत रहेकी उपप्रमुख गुमादेवी आचार्यले बताइन्।
कार्यक्रममा उपमहानगरका जनस्वास्थ्य अधिकृत उमा थापा, मेडिकल अफिसर डा. राजिव केसी, खोप कार्यक्रम प्रमुख कल्पना भट्टराई, जनस्वास्थ्य परीक्षक गीता पाण्डे तथा स्टोर प्रमुख खेमबहादुर पौडेललगायतले खोप लगाउने तरिका, असर र त्यसको निराकरण गर्ने उपायलगायतका विषयमा जानकारी गराएका थिए ।
स्वास्थ्य मन्त्रालय अनुसार ६० वर्षमाथिका करिब २७ लाख ज्येष्ठ नागरिकलाई खोप लगाउने योजना छ । बुटवल उपमहानगरमा यो उमेर समूहका करिब २० हजार नागरिक रहेको अनुमान छ । कोभिड विरुद्धको खोप कार्यक्रमलाई समुदायमा लैजानु अघि बुटवल उपमहानगरमा जोखिमयुक्त समूहमा कोभिड एन्टिजन परीक्षण कार्यक्रम सञ्चालन गरिने भएको हो ।
१९ वटै वडामा जोखममा रहेका समूहको पहिचान गर्दै उनीहरुको अवस्थाका बारेमा अभिलेख र परीक्षण गरिने उपमहानगरका स्वास्थ्य शाखा प्रमुख जनस्वास्थ्य अधिकृत उमा थापाले जानकारी दिइन्।
