अदालतले सही फैसला गर्छ भन्ने हाम्रो विश्वास छ-प्रचण्ड

नेकपा प्रचण्ड–नेपाल समूहका अध्यक्ष पुष्पकमल दाहाल ‘प्रचण्ड’ले सर्वोच्च अदालतले प्रतिनिधिसभा पुनर्स्थापनाको फैसला सुनाउने विश्वास व्यक्त गरेका छन् ।

मंगलबार काठमाडौंमा आयोजित कार्यक्रमलाई सम्बोधन गर्दै अध्यक्ष प्रचण्डले अदालतले प्रतिनिधिसभा पुनर्स्थापना गर्ने विश्वास आफूलाई रहेको बताएका हुन् ।

‘हामीलाई अदालतप्रति विश्वास छ । अदालतले संसद् पुनर्स्थापनाको पक्षमा फैसला सुनाउनेछ,’ उनले भने । प्रधानमन्त्री केपी शर्मा ओलीले ५ पुसमा संसद् विघटन गरेपछि आफूहरू नयाँ प्रकारको युद्धमा रहेको उनले बताए ।

संसद् विघटनलाई प्रतिगमनको संज्ञा दिँदै अध्यक्ष प्रचण्डले अहिले भएको आन्दोलनलाई शान्तिपूर्ण युद्ध मान्नुपर्ने बताए । ‘५ पुसदेखि हामी नयाँ युद्ध लडिराखेका छौँ । अर्को पक्ष जसले यसलाई अपहरण गर्न खोजेको छ ७०–७१ वर्षको आन्दोलनका उपलब्धिलाई त्यो हतियार बन्द हुन खोज्छ । राज्यको शक्ति प्रयोग गरेर दबाउन बल गर्न खोजिँदै छ । हामी रक्तपातहिन युद्ध, शान्तिपूर्ण युद्ध, नयाँ प्रकारको युद्धमा छौँ,’ उनले भने ।

धेरै दुःखले पार्टी एकतावद्ध गरिएको उल्लेख गर्दै अध्यक्ष प्रचण्डले अहिले विभाजन गर्न ठूलो षड्यन्त्र भइहेको बताए । प्रचण्डले आफूहरूले एकतावद्ध भएर देशमा नयाँ आयाम ल्याउन खोजेको भए पनि प्रधानमन्त्री ओलीले पार्टीलाई फुटाउने र व्यवस्थालाई विघटन गर्ने बाटो रोजेको बताउनुभयो ।

‘पार्टी धेरै दुःखले एकतावद्ध गरिएको हो । धेरै मेहनत गरिएको हो । हामी सबैको समर्थन र योगदान त्यसमा छ । यसलाई विभाजन गर्ने निकै ठूलो षड्यन्त्र र कसरत अहिले भइरहेका छन्,’ उनले भने ।