फेसबुकमा सूचना तथा रमाइलोका लागि खोलिएका अनेकौँ ग्रुप छन् । तीमध्ये कुनै ग्रुप उटपट्याङका लागि चर्चित छन् भने कतिपय ग्रुप सामाजिक गतिविधिका कारण लोकप्रिय छन् । यस्तै धेरैद्वारा रुचाइएको ग्रुपको सूचीमा पर्छ ‘दाह्री ग्याङ’ ।
झट्ट सुन्दा यो उटुङ्गीहरूकै समूहजस्तो लाग्छ । तर, ग्याङले आफ्नो सामाजिक छवि खास बनाइसकेको छ । सार्वजनिक सरोकारका विषयमा पैरवी गर्नेदेखि विकृति, विसङ्गति, भ्रष्टाचारविरुद्ध खबरदारी गर्नेसम्मका कार्यमा दाह्री ग्याङको सक्रियता रहने गरेको छ । सिर्जनात्मक र नवीनतम काममा पनि अग्रसर छन् दाह्री ग्याङका युवा ।
हिजो बुधबार साँझ दाह्री ग्याङका युवाहरूले प्रधानमन्त्री केपी ओलीलाई भेटेर रकेट प्रोजेक्ट ‘गरुडा’का बारेमा जानकारी गराए । ‘राष्ट्रका लागि युवा’ अभियानमा दाह्री ग्याङसहित विभिन्न क्षेत्रमा क्रियाशील डेढ सयभन्दा बढी संघसंस्था छन् ।
रकेट उडाउन अनि पानीले चल्ने गाडीको मास प्रोडक्सन गर्नका लागि प्रधानमन्त्रीसँग भेट गरिएकाे दाह्री ग्याङका युवाहरूले बताएका छन् । भेटमा ऊर्जामन्त्री टाेपबहादुर रायमाझी पनि थिए ।
प्रधानमन्त्रीका प्रेस सल्लाहकार सूर्य थापाले ट्वीटरमा दाह्री ग्याङका युवाहरूसित प्रधानमन्त्रीले भेटवार्ता गरेको उल्लेख गरेका छन् । उनले लेखेका छन्, ‘राष्ट्रका लागि युवा, दाह्री ग्याङसँगको भेट ।’
वैज्ञानिक अल्बर्ट आइन्सटाइनको जन्मदिनको अवसर पारेर १४ मार्चमा आफूहरूले बनाएको रकेट लन्च गर्ने कुरा प्रधानमन्त्रीलाई सुनाएको दाह्री ग्याङका एड्मिन जगदीश भण्डारीले बताए । उनीहरूको योजना मन पराएर प्रधानमन्त्री ओलीले रकेट उद्घाटन गर्ने वचन दिएका छन् ।
कसरी सुरु भयो दाह्री ग्याङ ?
पुस २०७२ सालतिर दाह्री पालेका जगदीश आफ्ना केही साथीसहित संस्कृतिविद् सत्यमोहन जोशीलाई भेट्न ललितपुरस्थित उनको घर गएका थिए । पुराना केही तस्वीरबारे जानकारी लिने उनीहरूकाे उद्देश्य थियो । जोशीसित भेट्न पहिल्यै त्यहाँ केही पत्रकार पनि पुगेका थिए । ती सबैले दाह्री पालेका थिए । उनीहरूलाई देख्नेबित्तिकै संस्कृतिविद् जोशीले ठट्टामै भनिदिए, ‘तपाईंहरू दाह्री ग्याङ त होइन नि !’ जोशीको त्यो शब्द चित्तमा लागेर जगदीश र उनका साथी मिलेर ७ फागुन २०७२ मा जन्माएका थिए दाह्री ग्याङ, जुन आज फेसबुकका प्रतिष्ठित नेपाली ग्रुपमध्ये पर्छ ।
जगदीशले रमाइलो गर्ने उद्देश्यले नै दाह्री ग्याङ नामको ग्रुप खोलेका थिए । पछि उनले यो ग्रुपलाई तथ्यपूर्ण सूचना र सामाजिक गतिविधितिर मोडिदिए । अहिले दाह्री ग्याङमा विभिन्न क्षेत्रका १ लाख ६ हजारभन्दा बढी युवा जोडिएका छन् । देशविदेशमा दाह्री ग्याङको ब्यानरमा सामाजिक काम हुँदै आएको छ । जगदीशका अनुसार कतार र कोरियामा दाह्री ग्याङको संगठन नै बनेको छ । दुःखमा परेका र बिरामी भई उपचारका लागि पैसा नभएकाहरूलाई दाह्री ग्याङका प्रवासी युवाले सहयोग जुटाउने गरेका छन् l१० वर्षमा नेपाललाई सामाजिक र आर्थिक रूपमा सम्पन्न मुलुककाे रूपमा स्थापित गर्न सरकारलाई सक्दाे सहयाेग गर्ने जगदीश बताउँछन् ।
फेरि यो ग्रुप दाह्री पाल्नेहरूका लागि मात्र होइन, नपाल्नेहरू पनि थुप्रै छन् । ‘ग्रुपको उद्देश्य नै केही नयाँ गरौँ, सामाजिक क्षेत्रमा सक्रिय बनौँ भन्ने हो’, जगदीश भन्छन् । र, यसमा रमाइलाे नहुने नै पनि हाेइन । दाह्री पालेका युवाहरू ग्रुपमा तस्वीर पाेस्ट गर्दै कमेन्टबाजी गर्छन् भने दाह्री नभएकाहरूले पनि विभिन्न रमाइलाे पाेस्ट गर्ने गरेका छन् ।
पाँचौँ वार्षिकोत्सव मनाउँदै
दाह्री ग्याङले आज आफ्नो पाँचौँ वार्षिकोत्सव मनाउँदै छ । यस अवसरमा ग्याङले साउथ एसियन कलेजमा ‘इन्टरनेट सुरक्षा सचेतना कार्यक्रम’ आयोजना गरेको छ । यस अवसरमा रक्तदान कार्यक्रम पनि सञ्चालन गरिएकाे जगदीशले बताए ।
