अनलाइनमा पढ्न चाहने नेपालीहरूका लागि ‘मेन्टी’ एप तथा वेबसाइट सार्वजनिक भएको छ । मंगलबार स्वरस्वती पूजाको अवसर पारेर मेन्टीको बेटा भर्जन सार्वजनिक गरिएको हो ।
मेन्टी यस्तो प्लेटफर्म हो, जहाँ विभिन्न तहका पाठ्यक्रम पढाएर राख्ने गरिन्छ । अहिले सार्वजनिक भएको बेटा भर्जनमा भने कक्षा ११ र १२ को पाठ्यक्रमको सिकाइ राखिएको छ । आगामी दिनहरूमा यसलाई थप बृहत् बनाउँदै लगिने मेन्टीका सह-संस्थापक तथा सीईओ सुदीप न्याैपानेले बताए ।
उनले भने, ‘हामीले मेन्टीलाई अनलाइन युनिभर्सिटीको रूपमा विकास गर्न लागेका छौँ । अहिले बेटा भर्जन भएकाले धेरै कन्टेन्ट छैन । तर, आगामी दिनमा नर्सरी कक्षादेखि मास्टर्ससम्मको कक्षा राखिनेछ ।’ यी पाठ्यक्रमका कक्षाबाहेक अतिरिक्त सीप, व्यावसायिक कक्षाहरू पनि मेन्टीमा राखिने न्याैपानेले बताए ।
न्यौपाने अस्ट्रेलियाबाट पढेर फर्किएका हुन् । त्यहाँको शैक्षिक स्थिति र नेपालको शैक्षिक स्थितिमा धेरै अन्तर देखिएपछि नयाँ ढंगबाट पढाइ सुरु गर्न मेन्टी सुरु गरेको उनको भनाइ छ । भन्छन्, ‘नेपाली विद्यार्थीले पनि विश्वबजारमा प्रतिस्पर्धा गर्न सकून् भन्ने नै हाम्रो मुख्य उद्देश्य हो ।’
मेन्टीबाट पढ्नलाई विद्यार्थीहरूलाई पनि सहज हुने न्यौपाने बताउँछन् । ‘अहिलेको युग भनेको इन्टरनेटको युग हो । यो युगमा विद्यार्थीहरूले घरमा नै बसेर ज्ञान लिन सक्नेछन् । त्यसैका लागि मेन्टी सुरु भएको छ’, न्यौपानेले भने ।
