प्रधानमन्त्री केपी ओलीले जनताका सपना माथि कुठाराघात गरे – प्रचण्ड

बुटवल, प्रचण्ड–नेपाल पक्षीय नेकपाका अध्यक्ष पुष्पकमल दाहाल ‘प्रचण्ड’ले केपी ओलीले जनताका सपनामाथि कुठाराघात गरेको आरोप लगाएका छन् । उनले जनताको सपनामाथी कुठाराघात गरेका ओलीको निरंकुशता लामो समय नटिक्ने उनले बताए ।

प्रधानमन्त्री केपी शर्मा ओलीले प्रतिनिधिसभा विघटन गरेको विरोधमा प्रचण्ड–नेपाल समूहले बुटवलमा आयोजना गरेको लुम्बिनी प्रदेश स्तरीय विरोध प्रदर्शनमा प्रचण्डले ओलीले सबै जनताको सपनामाथि कुठाराघात गरी लोकतन्त्रको हत्या गरेको बताए ।उनले ओलीबाट संविधान र लोकतन्त्रको हत्या भएको उल्लेख गर्दै लोकतन्त्रको रक्षाको लागि लाग्न सबैलाई आग्रह गरे ।

पार्टी एकताको मर्म विपरित तीन बर्ष नवित्दै एकताको सहमती तोड्ने काम ओलीबाटै भएको भन्दै उनले ओली निरंकुश बनेको बताए ।जनमतको उपेक्षा गर्दै ओलीले प्रतिनिधिसभा विघटन गरेको भन्दै नेता प्रचण्डले अदालतले प्रतिनिधिसभा पुनस्र्थापित गर्नेमा आफु विश्सस्त रहेको बताए ।

नेकपाको प्रचण्ड नेपाल पक्षका अध्यक्ष माधवकुमार नेपालले ओलीले राम्रा कुरा सुन्न सक्ने संस्कार नभएको आरोप लगाए । नेपालले ओलीलाई समयको गति बुझ्न नसक्ने व्यक्ति भएको समेत आरोप लगाए । आफ्नै बलबुताले नभई समयको पछिपछि लतारिने व्यक्तिलाई नेतृत्वमा ल्याएकै कारण अहिले समस्या निम्तिएको उनको भनाई छ । तत्कालिन नेकपा एमालेको नवौं महाधिवेशनमा ओलीले मत ल्याएर नभई जालझेल गरेर जितेको समेत आरोप लगाए ।

नेपालले बैशाखमा चुनाव गर्ने ओलीको दाबी विफल हुने भन्दै निर्वाचन आयोगले ओलीको पार्टीलाई अस्वीकार गरेको बताए ।
नेता नेपालले प्रधानमन्त्री ओलीले नेपाली जनताको भावना र चाहाना नबुझेका कारण समयको प्रभावसँग हिड्न नसकेको पनि आरोप लगाए ।

यस्तै विरोध सभामा बोल्दै नेकपा नेता घनश्याम भुसालले प्रधानमन्त्री ओलीमा निरंकुशताको प्रेत उत्रिएको बताए । राणा र राजाहरुको शैलीमा चुनौती खडा गरेको बताए ।आफैले चुनेको पार्टीको अध्यक्ष र प्रधानमन्त्रीले नै चुनौती खडा गर्नुले उनमा राणा तथा राजाहरुको प्रेत उत्रिएको उनको भनाइ थियो ।

सदस्य वर्षमान पुन ‘अनन्त’ले प्रधानमन्त्री केपी शर्मा ओलीले माओवादी जनयुद्ध र त्यसमा सहभागीलाई अपमान गरेको भन्दै आपत्ति जनाएका छन्।उनले माओवादी जनयुद्धलाई कुहिएको फर्सी र जनयुद्धमा लागेकालाई बाँदरको संज्ञा दिएकोमा समेत उनले आक्रोश पोखेका छन्।

कार्यक्रममा नेकपाका नेताहरु युवराज ज्ञवाली, ओनसरी घर्ति, चक्रपाणी शर्मा, ठाकुर गैरे लगायतका नेताहरुले सम्बोधन गरेका थिए ।अर्थमन्त्री एवं नेकपाका महासचिव विष्णु पौडेलको गृहनगर समेत रहेको बुटवलमा प्रचण्ड नेपाल समुह नेकपाले व्यापक जनसहभागित देखाएको थियो ।