अभिनेत्री वर्षा सिवाकोटी फिल्म छाड्ने मामलामा सबैभन्दा अगाडि छिन् । स्क्रिप्ट र भूमिका चित्त बुझेर फिल्म साइन गरे पनि छायांकन सुरु हुने समयमा विभिन्न कारण देखाउँदै हात झिक्ने उनको पुरानो बानी हो । उनले अहिलेसम्म कागजी सम्झौता गरेका धेरै फिल्म छाडिसकेकी छन् । रोचक कुरा चाहिँ के छ भने उनले छाडेका प्रायः फिल्म बक्सअफिसमा पत्तासाफ भएका छन् ।
‘रानी महल, मेरो पैसा खोइ ?, गोपी’ लगायतका फिल्म उनले छायांकन सुरु हुने समयमा छाडेकी थिइन् । यसबीच, उनले अर्को फिल्मबाट पनि हात झिकेकी छन् । डेढ वर्ष अगाडि उनले रमेश बुढाथोकीले निर्देशन गर्न लागेको फिल्म ‘सुदूर’ साइन गरेकी थिइन् । तर, विभिन्न कारणले छायांकन ढिला भएपछि उनले फिल्म छाडेकी छन् । उनी सहमतिमा नै फिल्मबाट बाहिरिएकी हुन् ।
फिल्मको छायांकन निर्धारित समयमा नभएका कारण आफूले समय दिन नसकेको वर्षाको भनाई छ । लकडाउनमा आफू नयाँ व्यवसायमा आबद्ध भएको र ‘सुदूर’ को छायांकनको समयमा अर्को फिल्मको छायांकन गर्नुपर्ने भएकाले काम गर्न नसकेको उनले बताइन् । निर्देशक बुढाथोकी यो फिल्मको आउँदो चैतबाट छायांकन सुरु गर्ने तयारीमा छन् । फिल्मको छायांकन जुम्लामा हुनेछ ।
वर्षाले फिल्मबाट हात झिकेपछि अहिले निर्माण टिम अर्को अभिनेत्रीको खोजीमा छ । फिल्मका लागि मुख्य नायकको प्रस्ताव भने पुष्प खड्कालाई गरिएको छ । उनलाई स्क्रिप्ट र आफ्नो भूमिका चित्त बुझेको छ । निर्माण टिमसँग मौखिक सहमति भए पनि कागजी सम्झौता नभएको उनी बताउँछन् । निर्देशक बुढाथोकी लामो समयपछि यो फिल्मबाट निर्देशनमा फर्किन लागेका हुन् ।
