सरकारले कोरोना भाइरस विरुद्धको खोप अभियान आगामी बुधबारबाट सुरु गर्दै

सरकारले कोरोना भाइरस (कोभिड- १९) विरुद्धको खोप अभियान आगामी बुधबारबाट सुरु गर्ने भएको छ । प्रधानमन्त्री केपी शर्मा ओलीले १४ माघ बिहान १० बजे कोरोनाविरुद्धको खोप अभियानको शुभारम्भ गर्ने स्वास्थ्य तथा जनसंख्या मन्त्रालयले जानकारी दिएको हो ।

आइतबार सातै प्रदेशका मुख्यमन्त्रीसँग छलफलमा स्वास्थ्य हृदयेश त्रिपाठीले अभियान देशभर एकैपटक सुरु हुने जानकारी दिए । सम्भव नभएका स्थानमा १८ माघभित्र खोप लगाइने मन्त्रालयले योजना बनाएको छ ।

सुरुमा फ्रन्टलाइनरमा रहेर काम गर्ने व्यक्तिलाई कोरोनाविरुद्धको खोप दिने छ । यसका लागि भारतले १० लाख डोज खोप नेपाललाई अनुदानमा उपलब्ध गराएको छ । अनुदानको खोप बिहीबार काठमाडौं आइपुगेको थियो ।

मन्त्रालयले आज देशभरका सबै सात प्रदेशमा आवश्यक पर्ने खोप पुऱ्याइसक्ने जनाएको छ । अक्सफोर्ड र एस्ट्राजेनेकाले विकास गरेको तथा सेरम इन्स्टिच्युट अफ इन्डियाले उत्पादन गरेको ‘कोभिसिल्ड’ खोपका सरकारले आपतकालीन प्रयोगका लागि अनुमति दिएको छ ।