चार नम्बर जीतपुर : सरकारले वैज्ञानिक वन व्यवस्थापनमा लगाएको रोक फिर्ता नलिएको भन्दै कपिलवस्तुमा वन उपभोक्ताहरुले प्रदर्शन जारी राखेका छन् । उनीहरुले आज कपिलवस्तुको चन्द्रौटा डिभिजन वन कार्यालय घेराउ समेत गरेका छन् । सामुदायिक तथा साझेदारी बनका उपभोक्ताहरुले सरकारले गरेको निर्णय बिरुद्ध प्रर्दशन समेत गरेका थिए । संजालले कपिलवस्तु जिल्लाभर पौष १६ गते सम्पूर्ण यातायात बन्दको घोषणा गरेको छ ।
हजारौंको संख्यामा प्रदर्शनमा उत्रिएका प्रदर्शनकारीहरुले वैज्ञानिक वन व्यवस्थापन सहित देशभरी काठजन्य वस्तुमा लगाएको प्रतिबन्ध फुकुवा गर्न पटक पटक माग गरेपनि त्यसलाई सरकारले बेवास्ता गरेका कारण सडकमा उत्रिन परेको आक्रोश व्यक्त गरेका थिए ।
जेष्ठ १५ गते गरेको मन्त्रीपरिषदको निर्णय असान्दर्भीक, हचुवाको भरमा ल्याइएको, यो नीतिले विदेशी काठको आयात बढ्ने र नेपाली काठ जंगलमै कुहिने अवस्था आएकोले निर्णय सच्याउन आग्रह गरेको समितिका संयोजक रेनु सेनले जानकारी दिनुभयो ।
उहाँले पटक पटक आन्दोलन गर्दा समेत सुनुवाई नभएको कारण अब सडक बन्द लगायतका आन्दोलनका कार्यक्रम गर्ने बताउनुभएको छ ।
सरकारले जेष्ठ १५ गते देशका विभिन्न क्षेत्रमा काठ ओसारपसार गर्ने कार्यमा बनक्षेत्रको दुरुपयोग भएको भन्दै सबै काम तत्काल रोक्न र जे जहाँ छ त्यहि राख्ने निर्देशन सहितको निर्णय गरेको थियो । उक्त निर्णयको देशभर अहिले विरोध भइरहेको छ ।
देशभरका साझेदारी बन, वैज्ञानिक वन व्यावस्थापन लागू भएका सामुदायिक बन, बन पैदावार व्यवसायी महासंघ, बन सम्बद्ध संघ संस्थाहरुले समेत सरकारको निर्णय गलत भएको भन्दै सच्याउन दबाब दिदै आएका छन् । हजारौंको संख्यामा प्रदर्शनमा उत्रिएका प्रदर्शनकारीहरुले चन्द्रौटा डिभिजन वन कार्यालयका प्रमुख दुर्गा बहादुर कार्कीलाई अपिल पत्र समेत बुझाएका छन् ।
