पौष दोस्रो हप्ता गलकोटमा बगाले थापा समाजको कुल पुजा हुँदै  

बागलुङ पौष ७ ।
सातसय बगाले थापा समाज गलकोट नगरपालिका ७ मल्म बागलुङले यस वर्षको कुल पूजा आगामी पौष १५ गते गर्ने भएको छ । विश्वव्यापी माहामारीको रूपमा फैलिरहेको कोरोना भाइरस (कोभिड-१९) को कारण विगतमा जस्तो भव्य रूपमा यसपाली कुल पुजा नहुने भएको समाजले जनाएको छ । समाजका बन्धु मल्म सानोखोला निवासी यम बहादुर थापाको मंसिर २ गते असामयिक निधन भएपछि समाजले पूर्व निर्धारित गरेको पौष ७ गतेको मिति परिवर्तन गरी पौष १५ गते पूर्णिमाको दिन गर्ने निर्णय गरेको हो ।

समाजले यस अघि कुलपूजा तयारीको निमित्त पौष ५ गते बोलाईएको बैठक १२ गतेको लागि तय गरेको सातसय बगाले थापा समाज गलकोट बागलुङका अध्यक्ष दल बहादुर थापाले जानकारी दिनुभयो ।अध्यक्ष थापाका अनुसार परम्परागत रूपमा गरिँदै आएको बगाले थापाको कुल पूजालाई यस वर्ष पौष १३ गते दिउँसो तोरी पेल्ने र साँझ पख मन्दिरमा दीप प्रज्वलन गर्ने, पौष १४ गते कुल मन्दिर सरसफाइ तथा गवरा बार्ने र पौष १५ गते समितिद्वारा मन्दिरमा पूजा अर्चना गर्ने निर्णय गरिएको छ । समितिले कोभिड १९ को संक्रमणलाई मध्यनजर गर्दै स्वास्थ्य सुरक्षा मापदण्ड पालना गरी कुल मन्दिरमा बन्धुहरुले धूप, धया र भेटी लिएर आउन अनुरोध गरेको सातसय बगाले थापा समाजका केन्द्रीय प्रतिनिधि छुम बहादुर थापाले जानकारी दिनुभयो ।

यस वर्ष सामान्य तवरबाट कुल पूजा गरिने समितिले जनाएको छ । गलकोट मल्ममा देशका विभिन्न ठाउँहरु ताराखोला, बडिगाड, ढोरपाटन, बागलुङ, पोखरा, बुटवल, नारायणगढ, नेपालगञ्ज, भारतको देहरादुन, दिल्ली सँगै विदेशसम्म फैलिएका बगाले थापाहरु कुलपूजा गर्न आउने गर्दछन । कुल पूजाले बन्धुहरू बिच एकता, आपसी भाइचारा समेत बढाउने विश्वास लिईन्छ । विगतमा कुल पूजाको दिन बिहान निशान घरदेखि नौमती बाजा र पञ्चकन्याको साथमा कुल मन्दिरसम्म कलश यात्रा, झण्डोत्तोलन, बलि, पूजा अर्चना, प्रसादी वितरण र सामुहिक भोजको भव्य कार्यक्रम हुने गर्दथ्यो ।

यस पटक कोरोना भाइरस संक्रमणको कारण जटिल परिस्थिति सृजना भएको हुँदा सामान्य रूपमा गरिने धौलागिरी बगाले थापा समाजका उपाध्यक्ष राज बहादुर थापाले बताउनु भयो । बगाले थापाको ईतिहास हेर्दा वि.सं. १२४६ देखि वि.सं. १५४५ सम्म म्याग्दीको ताकम, ज्यामरुकोट र पुलासम्म थापा राज्य सञ्चालन भएको देखिन्छ । वि. सं. १५४५ मा मल्ल राजा दिम्ब बम मल्लले आक्रमण गरेपछि ताकमबाट बगाले थापाहरु गलकोट, स्याङ्जा, गोरखा, काठमाण्डौ लगाएतका ठाउँहरुमा गएको समाजका संरक्षक एवं प्रध्यापक डा. दिनबहादुर थापाले जानकारी दिनुभयो ।
समाजले प्रत्येक कुल पूजामा बगाले थापाको ईतिहास, विभिन्न लेख, रचना, सामाग्री सहितको स्वाभिमान बुलेटिन पुस्तक समेत प्रकाशित गर्दै आइरहेको छ ।