बुटवलमा माध्यमिक विद्यालय लक्ष्यित विभिन्न खेलकुद कार्यक्रम सञ्चालन हुदै

बुटवल,
बुटवल नगर खेलकुद विकास समिति बुटवलले उपमहानगरपालिका अन्तरगतका माध्यमिक विद्यालयहरुलाई लक्षित गरी खेलकुद शिक्षक तथा प्रशिक्षकहरुलाई राष्ट्रपति रनिङ्ग शिल्ड सँग सम्बन्धित खेल विधालाई केन्द्रीत गरी प्रशिक्षण कार्यक्रम सञ्चालन गर्ने भएको छ ।
बुटवल नगर खेलकुद विकास समितिका संयोजक नन्दबहादुर काउचाको अध्यक्षतामा सदस्य सचिव कोपिला ज्ञवालीको सञ्चालनमा सम्पन्न १८औं बैठकले खेलकुद शिक्षक तथा प्रशिक्षकहरुलाई यही पौस १९ गते देखि देवीनगर स्थित नवीन औद्योगिक कदर बहादुर रीता मा.वि को सभाहलमा सैद्दान्तिक प्रशिक्षण र नवीन औद्योगिक मा.वि र लुम्बिनी वाणिज्य क्याम्पसको संयुक्त खेलमैदानमा प्रयोगात्मक प्रशिक्षण सञ्चालन गरिने भएको छ ।
उक्त प्रशिक्षणको लागि बुटवल नगर खेलकुद विकास समितिका सदस्य एवं नवीन औद्योगिक कदर बहादुर रीता मा.वि का प्रधानाध्यापक प्रेम बहादुर बस्नेतलाई संयोजक तोकेको छ ।
उक्त प्रशिक्षणमा बुटवल उपमहानगरपालिका अन्तरगतका माध्यमिक तह सम्म अध्यापन हुने सामुदायिक तथा निजी विद्यालयका खेलकुद शिक्षक तथा प्रशिक्षकहरुलाई दोस्रो बुटवल उपमहानगर स्तरीय राष्ट्रपति रनिङ्ग शिल्ड २०७७ का खेल विद्याहरुलाई लक्षित गरी राष्ट्रिय स्तरका खेलकुद प्रशिक्षकहरुबाट तालिम सञ्चालन गरिने नगर खेलकुद विकास समितिका सदस्य प्रेम बहादुर बस्नेतले बताए ।
प्रशिक्षणका अतिरिक्त समापनको दिन आठौं वृहत राष्ट्रिय खेलकुद प्रतियोगितामा बुटवल उपमहानगरपालिकाबाट सहभागी खेलाडीहरु ,राष्ट्रिय प्रशिक्षकहरु तथा खेल पत्रकारलाई सम्मान गर्ने कार्यक्रम रहेको नगर खेलकुद विकास समितिका संयोजक नन्दबहादुर काउचाले बताउनु भयो ।